由新加坡上市影視娛樂製作公司mm2投資、趙雅芝囝囝黃愷傑主演一部以當兵為題材嘅新加坡電影《新兵正傳3：蛙人傳》，今日喺城市大學舉行交流會，mm2（香港區）執行董事夏雨、導演梁智強亦有到場。
講到黃愷傑喺戲中飾演衝動港男，佢笑住話：「我都係港男，因為我喺香港出世，其實呢個角色同我本身嘅性格好唔同。」導演表示今次由陳欣健推薦黃愷傑，又指黃愷傑喺戲中要上山下海。黃愷傑話：「當兵好辛苦，好嚴謹。」媽咪有冇愛心湯水？佢話：「冇呀，因為全程喺新加坡拍。」佢又指媽咪同爹哋已經睇過首映，覺得佢仲有進步空間。
夏雨現時擔任新加坡上市影視娛樂製作公司mm2（香港區）執行董事，佢透露稍後會有一連串計劃，包括明年7月投資一部5000萬港元嘅電影，到時會邀請一線巨星參演，例如劉德華、郭富城等，另外亦會同廣東電視台合作。
問夏雨係咪退居幕後？佢就話：「都會拍，有啲傾緊。」問係咪TVB搵佢？佢即刻話：「冇呀，0依家大地震，邊個揸弗都唔知，聽聞珍姐（高層曾勵珍）會唔會做顧問又唔知。」
談到關菊英唔續約無綫，「Joe鮑」夏雨話：「佢又走，(李)司棋又走，我哋可以喺出面開部《溏心風暴3》，林峯係自由身，可以同英皇傾，陳法拉又係自由身，係爭個陳豪啫，劉家豪（《溏心》監製）又喺出面，可以原班人馬開套電視劇，不過相隔咗5年，唔知演員狀態係咪咁fit，觀眾仲接唔接受。」
| (攝影：黃曉妍) |  夏雨現時擔任新加坡上市影視娛樂製作公司mm2（香港區）執行董事。 |  |
 |
|
鍾意就快D Share啦！
|
|
|