第一次懷孕的 Ada，在影樓拍寫真時半裸上陣，上身僅以手遮掩。雖然很性感，但一點也不色情，反而有一種溫馨的感覺。
城市打游擊
大肚婆祼潮
社會觀念不斷改變，不論你接受與否。
孕婦腹大便便以往被視為身材走樣肚臍變黑「好核突」，但現今的孕婦卻認為，這是一生最美麗時刻。
早前有網民在巴士上偷拍一名正在餵哺母乳的母親，認為「好過分」，於是將照片上載社交網站譏諷。怎知大部分人思想已轉變，網民一面倒狂插拍照者無知，認為餵哺母乳天經地義，而平機會也加入「圍」插，出面力撐該名餵哺母乳的母親，又譴責偷拍者的行為，直指此舉侵犯個人私隱，又強調婦女有權在任何時間及地方餵哺母乳。
孕婦最靚風氣於是一發不可收拾，而且自己撐自己，懷孕期間紛紛拍下相片放上 facebook已是指定動作，更多孕婦還不怕出位，拍下性感裸露寫真震撼眼球。一眾母親，無懼周邊奇異目光也要餵人奶外，也令一班佗着孩子的準媽媽大膽起來，為了留下懷孕的美好時光。
這股大肚寫真潮亦愈來愈流行，本刊去到一影樓，便有多名孕婦排隊等候拍攝，她們都有正當職業，例如空姐、商人、政府公務員和護士，都是因為肚內的孩子，令她們出位破格。最讓人驚奇的是，家中老公和小孩都舉手贊成，留住這最美一刻，大肚婆最靚。
聖誕節前一個晚上，荔枝角工業區一帶慣常的寂靜，路上行人漸漸稀少。但其中一幢工廈的影樓內，情況卻十分熱鬧，擠滿了前來拍照的客人。她們不是身材浮凸的𡃁模，也不是亭亭玉立的少女，反而全部是身形圓潤、行路時捧着肚子的大肚婆。
原來，她們要來一次破格，剝衫剝褲拍一輯超性感寫真。
「雖然大肚寫真喺外國興起咗好多年，但香港一直唔太流行。不過，自從影星蔣怡影咗輯大肚寫真後，加上香港近年孕婦着力維護自己權益，懷孕已變成是值得驕傲。於是愈來愈多本地孕婦跟住影。除咗穿內衣褲，有些客人甚至會半裸或全裸，好大膽㗎。」攝影師 Max表示，大肚寫真已成為一股潮流，單單他的影樓每個月至少也有八至十宗這類生意，足證這現象已蔚然成風。
空姐趕潮流
「不如影一張側面嘅，我想更加突出我個肚呀。」今年二十九歲、任職空姐的 Ada，是首次懷孕。她也因為看見 facebook上孕婦爭先晒身材，於是也趕上潮流，趁大肚時來一次「壯舉」。由最初的 tube-top、睡裙，到最後愈玩愈開心，索性半裸上陣。
婚前思想保守，從未試過這麼大膽的 Ada，竟坦言已不介意有其他男性在場，只是想將懷着孩子的體形，清清楚楚地拍攝下來，只要靚就得。
Ada覺得，懷孕是女人一生最美的時刻，因為肚裡面有一個小生命，「一生人無幾多次機會大肚，影嚟做個記念，唔錯㗎。雖然肥咗好多，但無所謂啦，記念新生命嘅來臨更加重要。」她又認為，拍攝大肚寫真，跟之前拍結婚照感覺完全不同，因為今次主角不是自己，而是隆起了的肚子和肚內的孩子，所以肚子大一點也沒問題，「個肚愈大愈有味道。」
八個月影最靚
由於要突出肚子形態，所以很多孕婦都會在懷孕八個月後才去拍寫真， Ada亦同意這做法，但她提醒有意拍寫真的孕婦，不要太遲去影，「因為三十七週後，已經叫做足月，有機會隨時生得。如果真係早生，想影都無辦法。」
這樣袒胸露臂，會否太性感？ Ada就說不會，因為拍出來的效果很溫馨，一點也不猥褻，而且所有親友都讚，特別有過小孩的人都接受，反而未曾懷過孕的卻有些抗拒，這可能是只有懷過孕的人才覺得自己最靚。「其實呢啲係健康美，係一種健康嘅性感，唔係暴露嘅性感。就等於有啲媽咪餵人奶，都會影相留念啦。」
Ada又說，老公也很支持她拍寫真，「我同佢講想影，佢都話好。因為呢樣嘢愈來愈普及，以前就話思想守舊，新一代嘅準媽媽，思想開放咗好多，幾乎人人都會咁做，而且覺得啱就會去做。」她又說，本來想跟老公一起影，可惜他太忙。她無懼被人評頭品足，將會把這輯大肚寫真照上載社交網站，跟朋友分享喜悅。
把美麗留給小朋友
孩子出世後， Ada打算餵人奶，她希望社會大眾，不要歧視在公眾地方餵人奶的媽媽，「餵人奶嘅媽媽其實好偉大，市民應該要尊敬佢哋嘅勇敢，而唔係去歧視佢哋，亦唔應該去質疑點解要喺公眾場所做呢樣事情。」
同是第一次懷胎的商人 Angel（二十七歲），覺得拍大肚寫真，是留給自己最美和最珍貴的回憶，打算只生一胎的她，今次可能是一生中唯一一次懷孕，所以更加珍惜，「第一次去感受呢種（懷孕）感覺，好想記錄落嚟，將來可以跟小朋友去分享，讓他看看自己所有成長過程。」
這次拍照， Angel說跟拍結婚照的感覺完全不同。拍結婚照，是覺得自己踏入人生另一階段，而這輯大肚照，則帶着期待的心情，有一種迎接小生命的感覺，「影結婚相，係為自己而緊張，但今次係為一個小生命而緊張。」
思想開通的 Angel，日常生活也會拍泳衣照，所以今次穿透視睡裙拍攝，完全可以接受，但她覺得今次的性感跟以前的有點不同，「覺得有另一個人跟自己一齊性感，因為拍攝焦點都係個肚。以前影性感相，可能係整體嘅體態，又或者係某個部位嘅線條，但依家只係聚焦個肚已經好性感。」
貪靚的 Angel，說本來覺得自己肥了很多而不想拍，但當感覺到肚裡的小生命每日長大和郁動，就放下這種芥蒂，「會因為希望 BB健康成長，唔會再去諗肥唔肥。」
當晚 Angel的老公鄭生亦有陪她到來，雖然沒有跟她一起拍照，但也不時教她擺姿勢和用手機拍照，「佢（老公）都支持我影，因為佢都覺得留下美好回憶係好事，其實身邊好多朋友都有影。所以我覺得每個女性有咗 BB後，都應該考慮影寫真，免得將來後悔。」鄭生笑說，因為自己不上鏡，所以不參與拍攝，他又說這種大肚寫真感覺很寫實，將孕婦懷胎的情況，真實地記錄下來。
政府職員也來影
「 BB呀、 BB，等你出咗世大個仔，媽咪同你一齊睇番啲相，你就知道媽咪佗住你時係乜嘢樣啦。」今次第二次懷孕的前康文署職員 Janny（二十八歲），上一胎沒有拍寫真，已令她十分後悔，「生埋呢胎應該唔會再生，所以今次一定要影，將來留俾個小朋友睇。」
Janny笑說，雖然老公是一個思想傳統的男人，不喜歡拍照，但也沒有反對她拍寫真，「佢都知道一定會著好少衫，又要凸晒個肚出嚟俾人睇，但佢無反對，只係話唔可以唔著衫，唔可以剝光豬就得，哈哈哈。」記者問她有否想過全裸， Janny說自己雖然思想開放，但暫時還未有這份勇氣去到咁盡，「起碼俾塊布我遮吓啦，哈哈哈。」
她又覺得，能有機會拍攝大肚寫真，令她十分感恩，「唔係每個人都有機會影，男人一定無啦，而且依家唔係每個女人都會生 BB，所以今次影相嘅感覺好特別。」由於拍攝主題不同，她不會要求攝影師一定要把她拍得很美，「依家自己咁肥，點影都唔靚㗎喇，最緊要能夠拍出大肚嘅身形，有溫馨嘅感覺就夠。」而 Janny亦打算將照片擺到 facebook，亦不擔心得到負評，「身邊好多朋友都結咗婚，都係為人父母，佢哋會明白我嘅心情，年輕父母都接受。」
護士不再保守
而任職護士的 Suki，當晚就和老公和四歲兒子一起拍攝，兒子又不時親吻 Suki的肚子，場面得意，又瀰漫溫馨的感覺，「當年佗住阿仔時都有影，之後佢睇番啲相好興奮，所以今次都影，等妹妹以後都有得睇，作為一個留念。」第二次拍大肚寫真，感覺會否有所不同？「影第一胎比較輕鬆，因為只得我同老公兩個人，呢次多咗個大嘅，佢成日搗蛋，辛苦好多，哈哈哈。」
Suki又說，她平日衣著都是較保守，想不到自己會有勇氣拍寫真，雖然沒有裸露，但對她來說已是一個挑戰，「可能都係想個效果好啲，只有穿得性感少布，先至可以帶出肚內 BB正在成長，準備出世嘅感覺。我覺得呢一刻，真係好值得去記念。」
她又覺得，現在很多女性只會生一胎，更會珍惜懷孕的片段，所以令到更多人有興趣拍寫真，「所以如果有興趣影嘅，要一早計劃好幾時去影，唔好拖延，否則個 BB早咗出世，就無機會啦，唔通專登為影相而再大肚咩。」
很多人都說，母愛是最偉大的。母愛，亦令一班大肚婆勇敢起來，她們大膽破格，都是為肚內的孩子，留下最溫馨的回憶。
記者接觸一個又一個上來影寫真的大肚婆，部分人尺度大膽，但沒有人感到害羞，也影得開心，唯一覺得驚訝的，可能只有記者。
巴士餵人奶被鬧
大肚婆潮興拍性感寫真，而剛為人母兼餵人奶的何女士，也花掉二千多元，到影樓拍攝一輯餵哺人奶的溫馨照，「本身好鍾意影相，而且生完 BB又餵緊人奶，係好難得嘅機會，所以希望留個回憶。」
對於有母親在巴士上餵人奶時被偷拍，何也感同身受，試過一次在巴士上餵人奶時，雖然已經用布遮着，但當時巴士上太多人，令她十分尷尬，但她都沒有理會，繼續照餵，其後有人大聲說：「有無搞錯呀，喺巴士上做埋呢啲嘢。」又有一次坐巴士時， BB肚餓哭起來，但因為有男人坐在旁邊，令她不好意思餵人奶， BB愈喊愈大聲，最後旁邊的男人更罵她：「你個 BB好嘈呀。」
她希望政府推行多些宣傳教育，令更多人明白餵人奶對母親和孩子都有好處，亦希望多些商場開設母乳室，方便一眾母親餵人奶。
撰文：程志康
攝影：金文、韋平、王晴
news@nextdigital.com.hk
|
鍾意就快D Share啦！
|
|
|
