早前陳展鵬大熱倒灶輸視帝，雖然擸番個豬肉獎，仍難掩不悅之色。
娛樂偵訊
有獎品又有獎金 無綫補償燶面陳展鵬
失落視帝，陳展鵬當眾面黑，有指事後他上門找曾勵珍講數！半邊仔唔開心，珍姐立即諗計安撫。除了有 16年重頭劇《巨輪 2》助爭視帝外，還有連串搵銀計劃，包括廣告代言及登台，亦會安排唱主題曲出碟，安撫行動，出齊獎品獎金。
講數幾粒鐘
陳展鵬憑《張保仔》「十一貝勒」一角連掃馬來西亞兩視帝，但在無綫頒獎禮卻被眾望所歸的黃秋生截胡；雖然無綫已安排他攞「我最喜愛男角色」，但陳展鵬無法釋懷當眾黑面。
事後，有公司同事目睹，陳展鵬到製作部搵珍姐理論。
「嗰日煎 Pang自己一個返公司，佢哋傾咗好多粒鐘，由珍姐間房開始傾到落西餐廳。其實輸俾秋生應該心服口服，但煎 Pang喺大馬攞咗兩個視帝，個心雄晒！加上之前有風話秋生唔係自己人，未必會俾獎佢，煎 Pang就更加以為自己有機會。
「不過煎 Pang始終係珍姐一手簽返嚟，一向都好睇佢台戲，今次撞正秋生都冇辦法，但聽講珍姐應承佢，出年嘅《巨輪 2》同《城寨英雄》，會力谷，仲話《巨輪 2》可以睇高一線，幫佢攞視帝。」知情人說。
情人節陪鍾嘉欣
開期票做視帝，當務之急，要撲熄陳展鵬把火，最實際方法是俾錢佢賺。
據知，大台已為陳展鵬安排連串搵錢大計，包括日前在吉隆坡舉行的汽車潤滑油廣告發布會及檳城商演；嚟緊的情人節亦將與緋聞女友、《巨輪》拍檔鍾嘉欣往美國登台，為稍後推出的《巨輪 2》造勢；另外又霸定主題曲，自己劇自己唱，方便他有自己歌可以登台𢱑銀。
「以前煎 Pang喺亞視已經同鄭世豪、喬寶寶佢哋，跟埋黑妹姐（李麗霞）去登台搵食，因為佢都有唱亞視劇主題曲，有自己歌，登台會受歡迎啲；所以近年煎 Pang好落力爭取自己唱番主題曲、插曲。嚟緊煎 Pang有好多登台做，單係一六年上半年，已經傾咗五、六個地方。」
霸住唱主題曲
期票支票雙管齊下外，據了解，無綫會為陳展鵬物色唱片公司出碟。
「煎 Pang以前簽過寶麗金，但出完隻 EP就玩完；佢一直都想做番歌手，舊年續約已經同公司講過想簽唱片公司，無綫依家要氹番煎 Pang，所以會積極發力，暫時傾緊 Neway，但未成事。」知情人說。
我始終最好
順得哥情失嫂意！人人都覺得自己最有資格稱帝，一旦攞唔到，就滿腹牢騷，甚至執包袱，一於唔撈！
張智霖
13年張智霖憑《衝上雲霄 II》「 Cool魔」一角大熱角逐視帝，最後敗給黃子華，他上台攞豬肉獎「最受歡迎電視男角色」時，笑容牽強又寸爆：「咁係咪代表 TVB唔鍾意我呢？」之後更發表「義氣仔女論」。
林峯
12年憑《雷霆掃毒》競逐視帝大熱倒灶輸給黎耀祥，連豬肉獎亦分了給馬國明，慘食白果的林峯嬲爆完騷即閃，並對記者說：「係有失望，唔開心冇得喺台上多謝 fans同家人，如果是我便好了。」之後林峯成立個人工作室，為 14年約滿離巢鋪路。
撰文、攝影、攝錄：娛樂組
|
鍾意就快D Share啦！
|
|
|
