探熱針
吳尊旺角掃 過萬蚊波鞋
已有一子一女的吳尊，近年刻意減產，只吼工時較短的商業活動，密執一樣搵唔少的他，日前在合肥做完商演經香港轉飛汶萊，兼順道搜購 Air Jordan。要達到目的，吳尊寧願捱眼瞓，提早起身撲落旺角。結果唔使十分鐘掃走五對特別版，都只係萬鬆蚊，抵！
唔試就買
上週三（十二月廿三日）上午十一時，戴住口罩 cap帽的吳尊失驚無神現身旺角，唔係開工，係買波鞋；明顯熟路的他一支箭衝了上一幢大廈，好趕！
見到汶萊貴客光臨，老闆親自招呼。本來戴住口罩遮樣的他，望住多對心頭好眉飛色舞，最終忍唔住除低口罩慢慢揀。吳尊試都唔試，講明自己著十號半，揀完一對又一對，不夠十分鐘，掃走五對特別版 Air Jordan後，速閃。之後便趕返酒店，攞行李去機場，出發飛返汶萊。
「佢係 Air Jordan超級 fans，今年十月品牌喺上海舉行三十周年慶典活動，吳尊都專登飛咗去朝聖。每次有新鞋款出，佢一定飛嚟香港掃貨，因為汶萊嗰邊冇得賣，所以佢每次嚟到，都會盡情咁買。」吳尊身邊人說。
飛澳洲拍戲
返汶萊與家人共度聖誕及元旦後，吳尊便要飛澳洲，為新片開工。近年因為想留多點時間陪伴一對子女，工作主要以時間短酬勞高的內地商演為主，劇集和電影，吳尊推得就推。
「過埋新年吳尊就會飛去悉尼拍《謎巢》，女主角李冰冰已經喺嗰邊開緊工，近年佢揀劇本揀得好認真，今次呢部係荷李活片，劇本同角色佢都鍾意，所以就算要飛去澳洲一段時間都照接。」身邊人說。
藝人熱捧店
旺角上樓鋪 Search是近來圈中人最愛幫襯的店鋪，除了潮著波鞋款式應有盡有外，最緊要係價錢合理，老闆招呼好，深得不少藝人歌手捧場。
撰文、攝影、攝錄：娛樂組
來源 source: http://hk.next.nextmedia.com
|
鍾意就快D Share啦！
|
|
|
