娛樂偵訊
輸俾張敬軒 周柏豪反面搵路走
入行七年的周柏豪，去年在商台頒獎禮奪得男歌手金獎後再做埋紅館處男騷，自定為一線男歌手；早前失落無綫的「最受歡迎男歌手」，新城「分獎禮」又唔夠張敬軒分得多，加上收到風稍後的港台及商台，同樣會敗在宿敵手下，明年約滿華納唱片的柏豪嫌公司唔夠牙力，已決定搵路走！
根本冇得撼
樂壇頒獎禮陸續派成績表，周柏豪以為與無綫修好，便坐定粒六攞「最受歡迎男歌手」，豈料頭彩唔中，反而生吞檸檬。
「華納同無綫破冰，安排旗下歌手出席『優秀選』，柏豪又拍音樂特輯，諗住『總選』嘅『最受歡迎男歌手』可以傾到俾柏豪，點知最後都係唔成功，柏豪嬲到索性唔到，搞到連詩雅同 Dear Jane都冇獎。
「柏豪舊年拎完『叱咤男歌手金獎』後，就以為自己已經爬上一線，佢認為唔應該輸俾軒仔，但軒仔今年個勢真係好，根本冇得撼。」知情者說。
扭計食白果
周柏豪惟有寄望在新城《勁爆頒獎禮》攞番個彩，點知連炒！大贏家又係張敬軒。
「《勁爆》咁多個獎，柏豪分到三個，不過啲獎唔夠軒仔勁同多，所以都係唔到，以行動抗議。唱片公司見柏豪唔去，就叫連詩雅都唔好出席，新城知係柏豪扭計搞到咁，所以照頒咗個『女歌手獎』俾連詩雅，柏豪就食白果。」
餘下的商台及港台頒獎禮男歌手獎項，據知都是張敬軒的囊中物。
「今年商台個『男歌手金獎』係軒仔，銀獎陳奕迅，柏豪最多係銅獎，佢本身同商台關係好，有機會俾面到嘅；港台就難講啲，柏豪唱埋《太陽計劃》首歌都唔夠軒仔鬥，好大機會唔去。」
唔飲水思源
有大頭症的周柏豪，更將唔夠人砌的責任，全推在華納唱片頭上。
「佢認為係公司唔夠牙力同電台、無綫 fight獎，柏豪最擔心係接唔到上年嘅氣勢，會撻番落二線，佢見同華納一六年約滿，所以索性喺外面放風聲話唔會留低。好多人都覺得柏豪咁做忘本，又唔諗吓當初華納點幫佢。公司你做初一人哋做十五，上月尾佢出嗰隻《 Roundabout》，華納亦刻意唔幫佢做咁多宣傳。」知情者說。
撰文、攝影、攝錄：娛樂組
|
鍾意就快D Share啦！
|
|
|
