錢國偉與年輕廿年的陳宛蔚今年十月結束愛情長跑，在洲際酒店豪花百萬宴請親友。
娛樂偵訊
錢國偉夫婦 蓮花宮拜神求子
五十有三的錢國偉（ Wilson），今年十月同後生過自己廿歲的陳宛蔚（ Calinda）拉埋天窗，婚後要做電影後期又要為古惑仔做巡迴演唱會，冇停過！直至最近，終於有時間交人，唔抗拒做老豆的 Wilson，立即孖住老婆到蓮花宮，還神兼求子！
蜜月泡湯
三卡鑽戒加跪地求婚，成功結束六年愛情長跑，今年十月，錢國偉於洲際酒店筵開五十多席，迎娶女友陳宛蔚。婚後錢導要丟低老婆，北上為賀歲片《美人魚》做後期，又要唧出檔期開戲和同鄭伊健等一班古惑仔走埠巡唱，一直冇期造人。
「 Wilson泊咗埋周星馳碼頭之後，假都冇得放，結婚嘅事已經大部分交晒比老婆同啲兄弟幫手，本來打算擺酒後想攝個時間去蜜月旅行，最後都因為要返大陸，睇住上賀歲嘅《美人魚》後期而取消，不過佢講明聖誕新年會留响香港陪老婆。」知情者透露。
拜神求子
今個月中，難得在港的錢國偉同老婆出動到大坑蓮花宮還神，只見他與陳宛蔚誠心上香，廟祝幫二人敲銅鐘作福時，錢國偉五體投地叩拜，之後再同老婆行到廟宇後化寶，化完寶，兩公婆再入廟拜多次神，才離開到附近茶餐廳醫肚。
「 Wilson有拜神習慣，除咗蓮花宮，仲會去北帝廟，幾年前佢幫過惹官非嘅陳志雲還神。《美人魚》對手咁多，所以 Wilson做足準備，拜神都係求心安，咁 Calinda當然係希望自己快啲造人成功，畢竟都三十三歲」知情者說。
事後，陳宛蔚回應說：「嗰日都係還神同求事事順利（想快啲成功有 BB？）努力緊！」
撰文、攝影、攝錄：娛樂組
來源 source: http://hk.next.nextmedia.com
|
鍾意就快D Share啦！
|
|
|
