57歲爾冬陞（小寶）上年拍《我是路人甲》嘅時候，聽聞同有份演出﹑於91年出世嘅24歲演員王婷行得好埋，搞到老婆羅曉文好唔高興，成個人瘦晒，為呢件事兩公婆都嘈得好厲害，婚姻都亮起紅燈。
佢老婆準備自立門戶，自己接戲做監製，同埋搞經理人公司，唔會再靠晒小寶。而小寶近期經常留喺北京，老婆就喺香港，早排爾太同屋企人去澳洲旅行，聽聞小寶都冇同行，同以前秤不離陀嘅關係，似乎有啲變化。
本報記者致電小寶老婆，問佢同老公關係有冇問題？有冇聽到老公同內地女星王婷嘅緋聞？爾太話：「吓！我同小寶冇乜嘢呀！冇離婚、更加冇聽過老公有任何緋聞，王婷唔係我公司演員，對佢嘅事我就唔多清楚，但據我所知，小寶同呢位女星應該冇乜特別關係。不過你等我再問下老公，等陣再覆你」
收線後，記者再聯絡咗住喺北京嘅王婷，問佢近期有冇結婚計劃？有冇懷孕？佢好爽快回應：「近期沒有結婚計劃，更加沒有懷孕。」再問佢係咪同導演冬陞交往中？佢話：「這個事情我不回答！」咁樣答法唔承認、唔否認，真係會令人有好多聯想。原本想再追問，但佢自己講完已經收咗線！
再打返俾爾太，話俾佢聽王婷冇承認同冇否認同小寶交往中，爾太話：「吓！咁得意！我同老公真係冇事喎！關係好開心呀！」
同爾太收線唔夠10分鐘，王婷又主動同記者重新講過同小寶關係佢話：「我跟爾導沒交往，拍完《我是路人甲》每次見到導演都是和一班人一起，沒單獨約會，他和老婆關係有沒有出狀況，我就不清楚。」
問佢之前做乜唔否認交往中，後來又改口呢？佢話：「經理人公司通知我，說《蘋果》會打來問，我被你的問題嚇倒了，所以不敢答就掛線了，後來鎮定下來，所以再重新回覆你。」
| 王婷就冇承認同冇否認同爾冬陞交往中。 |  王婷喺《我是路人甲》入面有份演出。(王婷微博圖片) |  (王婷微博圖片) |
 今年王婷24歲，同小寶相差33年。(王婷微博圖片) |  (王婷微博圖片) |  (王婷微博圖片) |
 有指小寶同老婆嘅婚姻亮起紅燈。(資料圖片) |  兩公婆成日形影不離。(資料圖片) |  (資料圖片) |
|
鍾意就快D Share啦！
|
|
|