現時店鋪面積大了五倍， Theo（左）立即利用優勢吸納更多行貨品牌進駐，最近就放置了清潔波鞋品牌的「擦鞋櫈」於當眼位置，他表示當有人使用立即吸引顧客注目，代理商都十分滿意效果。（關永浩攝）
壹盤生意
15年生意難撈 轉身頂硬上
創業者應該都有同感，剛過去的二○一五年，股市：唔掂；樓市：唔掂；零售：唔掂。生意真係，堅•難撈。去年本刊一共訪問了四十二個《壹盤生意》故事，與過去大有不同，成功故事少之又少，大部分盈利明顯下跌，另有三間結業，兩間頂手予人。
要成功保住生意，惟有識轉身。當《毛記分獎典禮》比「無綫視帝視后」更受矚目時，印證網絡世界已「踩入」真實生活。 facebook、 Instagram成為創業者開業首選，「 like」幾乎可以當錢使！港大輟學生吳梓歡（ Theo），上年力谷網絡宣傳，更與其他網店大玩 crossover， IG粉絲人數激增一倍至十萬，帶來的實際盈利亦一樣升了一倍，由廿萬到四十萬。
另外，做「麥記」收銀捱出頭、成為清潔公司老闆的葉劍池（ Angus），慘被四名伙記「起飛腳」，生意一度急跌六成，最後咬緊牙關、柳暗花明。而「荔苑」餐廳的老闆 Kenji，在去年真•荔園突然翻生後，捱不住執笠。訪問過的創業者，過去一年各有故事。
港大棄將賣 NB 靠 DM賺多倍
如果到今日你還未知道什麼是 DM，你盤生意將注定失敗﹗ DM代表 Digital Marketing，最簡單的說法，就是透過網絡做營銷。替客人在美國網站訂購 New Balance波鞋的鋪頭「 Second kill」，比行貨平四成，老闆 Theo不單懂得在 facebook及 Instagram做生意，避過昂貴租金，更識得玩 DM，拍片教人分辨波鞋真假，放上 YouTube。訪問時一個月賺廿萬，幾個月來，他再施展 DM「魔力」，繼續賺 like之餘，盈利大幅升一倍達四十萬。
IG放毒
原來 Theo逐漸少用 fb，重心轉向 Instagram，他說：「 fb係好方便，有晒 data俾你睇到個宣傳效果，但 Instagram競爭細，收費平﹗」他努力增加每日的更新次數，一到中午、收工時間就上載波鞋靚相，勤力「放毒」。但他知道靠一個 page去增加客戶數目，能力有限，於是想到方法。當大型連鎖店與明星 crossover出產品，經營小店的 Theo參考做法，但就是與其他網店 crossover：「佢哋俾啲行李喼、衫同零食我，我就俾啲波鞋佢哋拎嚟抽獎。人哋間網店都有幾萬 like，我哋幾間加加埋就有十幾廿萬網民，瀏覽量比起之前多好多倍。」現時他們上載每張相片到 Instagram，「閒閒哋」平均過千個「 like」， Instagram的粉絲數目達十萬，號稱全港網店最多。 Theo的女友 Sandy指除了呃 like，都要做真•生意，將吸納更多網店貨品到店內寄賣：「放多啲唔同嘢喺度賣，幫到行家之餘，自己又可以吸引到人流。」
讀書唔成 做事認真
四年前， Theo成功考入港大土木工程系，最後因成績太差被踢出校，頓成別人眼中的「廢青」。讀書唔成，唔一定懶懶閒，面對他喜歡做的事，絕對認真。本刊訪問當日找來專家、前 Mirabell董事及副總經理吳民傑給予意見，對方指做水貨毛利低，要賺大錢一定要做行貨市場。 Theo是少有的受訪者，不但不介意批評，搬鋪後就即時「做嘢」，上月他成功接洽清潔保養波鞋的品牌 Reshoevn8r代理，鋪頭有專用的「擦鞋櫈」，免費幫客人洗波鞋，「代理商將櫈搬過嚟試吓，佢哋有時間就會派人嚟免費幫客人擦鞋，每次都吸引到好多人圍觀。」他亦成功獲得 Gregory行貨代理，毛利可達四成，比只有一成多的水貨高得多。
Theo一直的目標是搬大鋪，錢賺多了，他亦終於夢想成真。位於家樂坊旁樓上商廈的新鋪在去年十二月中開業，面積比舊店大了五倍。生意有「錢」景，唔代表易做，常有難題新鮮出爐，他說：「舊年《競爭法》實施，波鞋街好多款真係平咗好多，我哋生意最差都跌咗三成。到十一月轉季，出面少咗特價貨，我哋生意先回復番。」另一難題是存貨，「入貨都多咗，之前專家講嘅庫存問題都開始發生，惟有不時減價去舊貨啦﹗」
清潔公司四名伙記「起飛腳」
創業者除了要識睇市，還要識睇人，三十一歲的葉劍池（ Angus）正好上了寶貴一課。本來在「麥記」做副經理的 Angus，開設清潔公司「小露寶」，專為食店做廚房清潔，盈利有三萬元，伙記都是過去在 M記打工的兄弟。但他交個心出來，結果卻被蹺起，「我將經驗傾囊相授其中一個 leader，包括清潔抽風系統的方法、每個部分的報價、哪些廚具設得太高無謂接等等，希望日後靠佢哋分擔工作。」但開設清潔公司的門檻太低，上年中四個舊伙記竟「變節」開了另一家清潔公司，他的怒火，依然未熄，「佢哋同喺我銀包搶錢無分別！唔好提嗰班『百街』，費事幫佢哋宣傳！」
因為被背叛，他曾打算放棄，「嗰陣直情想賣咗間公司，如果三唔識七毫無感情，無所謂，但嗰班𡃁仔係同我喺麥記出嚟，我當係朋友。結果撬咗我二十張單，六成生意，不過為咗家庭，都要捱。」最大問題是整間公司只剩下他和一個員工，要再額外請新人，由於新人生手，故要由以往四個人一齊做清潔，變請夠七個，「個客請我哋清潔，佢哋要搵員工留低關門，如果做慢咗個客會『詐型』，所以蝕住做都要請多幾個人！」這樣的情況要直至兩個月後，同事熟手了，才穩定下來。
把管理系統化
「依家睇化咗，唔會強求，我不如舒舒服服，十二點就陪囝囝返學，四點接放學，星期六、日去釣魚、同老婆行街。」能夠說得出這樣的說話，因為最困難的時間， Angus早經歷過。他兩年前創辦的清潔公司叫宏信，不過開業半年已累蝕三十萬，剛巧兒子出世，無錢交租， Angus更想過自殺，後來把鋪頭名改為「小露寶」，令人容易記得，生意才有轉機。心態改變命運，當他不強求，只專心做好眼前，竟又有生意自動送上門，「有兩個大集團同一時間聯絡我，佢哋嘅餐廳普遍晚上七時至十點關門，不是凌晨，清潔可以早啲開工，請人都容易咗﹗」
不過對待新請的員工，他就不再把所有事情交託，尤其有關錢銀的工序都不讓員工處理，由報價到接客都親自處理，最難搞的通風系統都親自清潔，以免再被飛起。「暫時人事、會計、營業，所有嘢都由我負責，如有新生意，到時亦會將公司系統化，分開前線員工與營業部等，無咁易撬走啲客。」 Angus現扣除自己人工，盈利由三萬元升至四萬多，最重要還是人生上了寶貴一課﹗
廚師的固執 蝕住捱
打電話相約劉師傅（劉文輝）訪問，他先跟記者表示：「近排真係好唔掂！快啲嚟幫手！」生意差，可以是市況唔好，也可以是管理失誤，但劉師傅的問題，卻來自他的一份固執。劉師傅曾在獲得「米芝蓮」的夏宮點心部任大廚，他對自己的出品充滿信心，但做生意不能只靠出品，沒有策略。去年五月，記者訪問他在荃灣開設「第四天拉麵」，當時盈利達四萬，但他難忍店鋪無法安裝冷氣，故一念之下決定將鋪頂手，並搬鋪到旺角先達廣場旁，改名「五谷之拉麵」，雖然營業額能維持，但租金卻多近三倍，每個月瀕臨虧蝕。
他指旺角難做，現日做十九小時：「開鋪頭四日，我夾埋先瞓得七個鐘，租太貴，無辦法。」他指現時租金約十四萬，簽約不久就遇上當區租金回落，他「揼心口」說，惟有做多幾個鐘頂硬上：「就算有個徒弟喺度，我都放心唔落，所以咪搞到得自己煮，搬鋪到依家瘦咗廿磅！」訪問開始時正值午飯時間，全店滿座，但他說：「夜晚就靜過鬼咁！」原來一碗叉燒拉麵午市賣四十三元，下午茶只賣二十八元，到晚上六時立即加到六十八元，但分量差不多，難怪晚市較靜。
炸子雞都有拉麵欠主題
訪問時本刊曾請有多家拉麵店的日本通陳方藤（ Meter），向劉師傅指點迷津， Meter直指劉師傅有「米芝蓮」中菜名譽，與其賣不正宗的日本拉麵，不如改賣中式麵食，以及將菜單簡化。怎料劉師傅堅持己見之餘，菜式愈來愈「港式」，除了加入「番茄湯」、「炸子雞」外，更加入鮑魚、原隻花膠等高檔中式食材，令餐廳品種古怪。「佢（ Meter）講就易啫，但係做就好難，新鋪知名度唔夠，無多啲嘢揀好難同人鬥，其實日本拉麵都係中國傳過去！而且做中菜要請好多人㗎，依家我都已經難請人，轉菜牌仲慘！」
固執令他的創業路更難行，但這份固執令他相信堅持下去，就會有轉機，「隔籬鋪的點心專門店，咪做得有聲有色，我都識佢老闆，佢以前咪都係同我一樣做得咁慘，又係捱貴租，但俾佢做做吓又做到。到咗晚市時，好多歐美遊客到點心店光顧㗎。」他指只要每日做到萬五元生意就能足夠應付開支：「再努力啲，請到人就 OK啦。」但生意未見曙光，已先賠上健康及家人關係，對此他不願多談，只道：「我都同啲仔女講，我長時間喺鋪，你哋自己要生生性性」
真•荔園開業 荔苑即執
上年初，荔園老闆邱德根突然過身，五月，其兒子邱達根決定短暫「重開」荔園七十日，吸引不少七十後重溫集體回憶。不過，作為 A貨、仿舊日荔園的餐廳「荔苑」，意外地被搶去不少生意，最終於上年八月結業。「荔苑」前身是「麻辣媽媽」，老闆 Kenji指轉型時租約已近尾聲：「嗰時得番半年約，業主講咗會加五成租（即十五萬），一開始時都仲 OK，諗住餐廳每日做二百個客，全港有幾萬人想回憶吓都夠做幾年，但中環荔園一開，聲勢即刻被人搶晒。咁多年都唔開，我轉做荔苑無耐就開……」餐廳現址至今丟空約半年，業主仍不肯減租：「成條街好多鋪都係咁，就係唔肯減。」他鋪頭裝修費已賺回，暫未打算再開餐廳：「依家個市咁，都係睇定啲先！」
鯛魚燒 頂手他人
去年鯛魚燒雪糕曾風靡一時，兩個理大女學生 Jo和 Regina開設 Café aboong，賣韓國鯛魚燒，最高峰時日賣五百多條，月賺四十萬，後來兩人把鋪頭頂手，本刊找到九十後新老闆 Bonnie，她指自己用四十萬元頂手，亦衰心急，「我頂手前，叫佢哋俾數據我睇，佢哋只肯攞出頭半年的數據，又臨時同我哋講最遲明天要簽約，當晚我逼佢哋交出最新數字，先知佢哋正蝕緊錢。佢解釋佢哋無日日開鋪，加上天氣凍，我覺得我搞得掂所以簽約。」本刊打算求證，不過兩名女大學生都沒有接聽電話。 Bonnie自知未考慮清楚就簽約，都有責任，故無打算追究，惟有嘗試多點新口味，加入芝士餡、含酒精雪糕等。一年死約一半都未過， Bonnie大嘆：「熱潮過咗，就算出新嘢都好難做，而家收支平衡算係咁。」
澳洲奶昔 貴租亦執
上年二月，訪問灣仔道澳洲奶昔專門店 Yo Yo Shake的老闆 Suki，借家人錢開業的她指，開業兩個月來已蝕近四萬。分子雪糕店老闆 Ronnie向她建議縮細分量，一來香港人胃口細，二來可以減價， Suki已照跟，不過直至去年八月始終捱不住結業。記者致電 Suki了解結業原因，她只回答一句就匆忙掛線：「因為頂唔住租金呀。」記者再以短訊追問結業原因、現時工作、要努力賺錢還給家人嗎？她只回覆：「產品唔受歡迎，其他問題唔答。」 Suki解釋的死因夠直接，希望她吸取教訓再戰江湖。
撰文：梁延宇、孫樂祈
攝影：財經組
攝錄：財經組
ed_bn@nextdigital.com.hk
|
鍾意就快D Share啦！
|
|
|