謝安琪鋪路淡出 全職湊仔
廿四孝媽媽謝安琪在事業高峰之際暫別樂壇一年，好好享受家庭樂兼努力造人，踏入猴年再洩密露口風，有計劃淡出娛樂圈，減少幕前演出，為當個全職媽媽鋪路！她直言為博兒子歡心，甘願放下天后身段到學校做義工。
自稱是傳統新抱的謝安琪（Kay）非常重視農曆新年，雖忙於籌備4月的紅館個唱《拾回謝安琪數愛世界巡迴演唱會香港站》，但仍堅持新春放假與家人享天倫。早前阿Kay宣布演唱會後將會放一年長假暫別樂壇，她透露將帶父母去旅行享受家庭樂，又計劃投身兒子張瞻的學校家長活動：「其他家長成日喺學校做Helper，佢都有問我幾時會嚟！咁多年我都冇辦法做呢樣嘢，今年我就做畀佢。」
「好想為佢做啲嘢」
阿Kay讚兒子年紀小小已懂得感謝，有時幫他開支票作參加課外活動之用，小小動作已令瞻瞻感激說：「媽咪多謝你！你咁忙都記得幫我買飛！」她笑言假如有一日瞻瞻見她失驚無神在學校出現幫手排隊或維持秩序，他一定開心到不得了：「我真係好想可以為佢做啲嘢！」
家族中不少都是盡忠職責的好媽媽及好太太，阿Kay坦言深受影響，指其中一位阿姨原本在公司高薪厚職，但有一年突然減薪調職，只為換取時間照顧兒子，最後甚至放棄工作當全職媽媽，問到她可會效法？阿Kay洩露口風：「我都係暫時想放假啫！變做全職媽咪梗係有好處，但喺事業、音樂上甚至一路做緊嘅環保工作、籌款、為弱勢社群做嘅嘢都想繼續做，我諗未致於歸隱田園，但大方向都係會慢慢咁低調，喺幕前比較冇咁活躍。」
讚兒子似父豪爽
一直與老爺奶奶同住的阿Kay指全家人都很傳統，年廿八會用碌柚葉洗邋遢：「佢哋叫香水！」還要換上新睡衣、新拖鞋及新床單，除夕則一家人食團年飯，大年初一亦要早起身向老爺奶奶拜年，她說：「跟住同我爹哋媽咪拜年，然後逐個阿姨、舅父、阿叔打電話祝賀，新年忙過返工！」阿Kay表示兒子很喜歡新年，但並非因為有得(手豆)利是，而是有好多朱古力零食：「佢好疏爽派番出去！因為佢哋新一代冇咩金錢觀念，又用八達通買嘢，所以新年人哋派利是畀佢，佢望都唔望就擺埋一邊或者畀我！佢都唔知裏面幾多錢係為之好多錢，或者啲利是錢有幾緊要，佢試過成大疊利是漏低喺人哋屋企冇拎到。」
兒子如此疏爽，阿Kay笑言是遺傳自老公張繼聰：「阿聰都鍾意請朋友食嘢、請朋友去玩，瞻瞻攞佢張八達通返學校，請晒成級同學食嘢！」嚇得阿Kay要幫瞻瞻的八達通取消自動增值，她笑說：「小朋友唔知，聽到嘟嘟嘟，咪係咁請同學食燒賣，佢太疏爽。」
文：音樂組
攝：秦健輝
髮型：Zap Tang@Queen's private i salon
化妝：Khaki Yan
服裝：Little Black Dress Central
|
鍾意就快D Share啦！
|
|
|