張繼聰爆肌任(目及) 同志嗌陪瞓！
新一代爆肌男神張繼聰為新劇五分鐘裸露的脫戲，進行日以繼夜的地獄式操練，完全陷入忘我瘋癲的狀態，將自己推至一個極限，以汗水換來性感誘人的八舊迷人腹肌，阿聰開心與眾share其人體妙學keep fit心得，竟惹來同志大膽留言：「我要睡你。」
本來瘦蜢蜢的張繼聰，年前為個人演唱會特意操到爆肌，自此他就操上癮，早前阿聰事先張揚為無綫新劇《幕後玩家》一場裸露脫戲，要再次陷入地獄式操練及淡而無味的生活。在健身教練指導下，阿聰忘我癲瘋加操，日以繼夜揮灑汗水艱辛操練，終於換來亮麗誘人的body，阿聰即向粉絲派福利，在社交網開心share其迷人朱古力腹肌的苦練心得。
半夜收工照操
阿聰留言教路keep弗：「每日工作時間大約十二至十六個小時，但係我仍然堅持每星期六天運動（一天休息）。」阿聰基本上每天做兩小時運動，又負重訓練，又帶氧運動，即使半夜三更收工都照操，做六組腹同背的運動。據知阿聰在《幕》劇中一場騷肌戲，日前已完成拍攝，阿聰昨日在電話中說：「嗰場戲五分鐘度，講我赤裸上身喺屋企行嚟行去，嗰日拍咗成個鐘。」為了五分鐘戲阿聰就花上二十日進行地獄式操練，他直認拍攝時身形是最弗的時候：「我由158、9磅減到141磅，我脂肪得7、8%，塊面都好凹。（好專業！）我覺得嗰種態度、鬥志，我對自己要求都好高，如果達唔到係唔得。（滿意自己個body？）OK啦，盡咗力。」
為求擁有滿意的身形，阿聰實行在運動同飲食兩方面雙管齊下，阿聰說：「我食咗十幾廿日烚菜同烚雞，每日都會自己帶備三餐開工拍攝，好多時最後一餐啲烚菜同雞都凍晒，但我都會照食，就算新年初一至三唔使開工，我都係照食嗰啲。」阿聰表示即使現在飲食回復正常，但他都以清淡為主，平日少食肥膩、甜的食物：「依家開工，晚餐都會早啲食，消夜有時都會食雞髀，但就唔食皮，有啲肥膩就拖一拖水。」
跑街親民揮手
阿聰承認做運動確會做到上癮，但他未去到軍訓咁癲，不會對自己太過苛刻，他說：「依家都會keep住做運動，如果凌晨四、五點收工，開翌日下午一點，咁我都會十點幾起身跑步。」日前下午阿聰就穿上運動裝單拖由大埔寓所出發，向三門仔跑步，大約跑了成粒鐘，沿途見他親民地與街坊笑晒揮手，問到太太謝安琪可有陪他一起運動？他說：「佢4月都要做演唱會，都有陪我跑吓步，但佢係女仔唔使好似我操到咁。」因他在網上大晒迷人body，有「基民」大膽留言：「我要睡你。」阿聰聽完笑說：「我結咗婚」
文：音樂組
攝：追蹤組
|
鍾意就快D Share啦！
|
|
|
