楊怡今日以一身米白色紗裙現身中環出席一本雜誌舉辦美容產品頒獎禮，身形纖瘦弗到漏。最近不時傳出四月就約滿嘅楊怡為結婚生仔、放棄同大台續約，楊怡今日澄清：「我想證明我身形仲好好，冇任何猜疑，合約係傾緊，冇話唔續，希望日後工作輕鬆啲，個人可以精神啲。」楊怡又話：「希望工作質素好啲，試唔同工作，例如接拍開心角色，因為咁多年嚟都係演啲喊戲。」係咪會爭取一年只拍幾部劇可以休息多啲，楊怡話：「當然唔想太辛苦，年紀大，劇接劇身體想好都唔得。」言下之意真係籌備結婚？楊怡就稱：「如果咁開心一定同大家講，承你貴言。」另外鍾嘉欣傳出有孕三個月趕住嫁（新聞連結： http://bit.ly/1XJS3vu ），楊怡話：「係咪真0架？我冇問佢八卦事，新年有互相祝賀，你哋咁講，我會八下，如果係真好戥佢開心，知道嘉欣好鍾意小朋友。」同場嘅林峯呢……佢當年都曾經……追過鍾嘉欣BB 0架……唔記得呢？不過鍾嘉欣當時情傾伍允龍，對呢位Chok爆闊少毫不動心。今日林峯甫被問及昔日女神傳婚訊，仲係雙喜臨門嗰隻，佢就淡然謂：「你哋應該問番佢，呢啲報道我睇完就算。」如果係真，戥嘉欣開心嗎？林峯話：「行內人有好事都值得慶祝。」好cool咁喎……噚晚係元宵佳節，林峯忙住搞演唱會嘅事，冇同吳千語BB慶祝，所以噚晚連見面都冇，加上近日要投入操練，唔會食太多嘢，噚晚連湯丸都唔可以食。
| 攝影﹕陳順禎 |  楊怡話同TVB仲傾緊合約嘅事 |  |
 林峯為演唱會密密操，冇時間見千語BB |  |
|
鍾意就快D Share啦！
|
|
|
