網頁

掃呢頁CODE去手機
請LIKE FACEBOOK“新專頁”THANKS!
鍾意我? D 熱爆文章嗎?
即刻“讚”接收更多熱爆?!
唔要再顯示

2016年2月10日 星期三

創富:股樓匯輪住震 趨吉避凶招財運 __,

next1/1pre雖然新年氣氛應該喜氣洋洋,但猴年開始外圍股市重挫,明日港股開市睇怕無運行!而人民幣匯價又腳仔軟!孖妹同股壇專家拜年時,畀挑通眼眉嘅佢哋發現咗呢番心事,佢哋仲即時贈孖妹一席話當係派利是,教埋大家點樣趨吉避凶添!祝:翱騰投資管理(香港)董事總經理祝振駒林:農銀國際證券董事總經理兼研究部聯席主管林樵基Kitty:今年金融市場開局奇差,唔講賺錢,先諗吓點樣避凶!香港人Hold住唔少人民 ...


next 1/1 pre

雖然新年氣氛應該喜氣洋洋,但猴年開始外圍股市重挫,明日港股開市睇怕無運行!而人民幣匯價又腳仔軟!孖妹同股壇專家拜年時,畀挑通眼眉嘅佢哋發現咗呢番心事,佢哋仲即時贈孖妹一席話當係派利是,教埋大家點樣趨吉避凶添!

祝:翱騰投資管理(香港)董事總經理祝振駒

林:農銀國際證券董事總經理兼研究部聯席主管林樵基

Kitty:今年金融市場開局奇差,唔講賺錢,先諗吓點樣避凶!香港人Hold住唔少人民幣,但近排人仔匯價係咁跌,咁點算好?

祝:梗係要搵機會轉走佢,嚟緊匯價仲會一路跌,揸住咪盞蝕更多!尤其係香港人唔似得內地人必須揸人仔,點解仲要揸?中央推出眾多政策旨在令佢跌慢啲,但匯價跌勢真係冇得估,外資基金做晒淡倉就當然想佢跌得快,而政府就想佢跌慢啲,大趨勢係跌,全年係跌2%、3%定4%真係冇人知道,估都嘥氣。

彩兒:除咗人仔之外,港股愈跌愈平,但所謂賤物鬥窮人,孖妹啲蟹貨有排未見家鄉,都無錢入市買平貨!

祝:股票係好平,但係平唔係一個買入原因囉,一定要有催化劑,好似一啲宏觀事件,例如係中國經濟數據有改善,或者中央推出激烈救市救經濟措施,類似08年用4萬億(人民幣)救市措施咁,或者要慢慢漚到經濟見底,不過因為08年一役副作用仲未消除,相信後者機會較大。依家我唔建議散戶短炒,盞嘥時間,最好離場,主因一般人博反彈多數都輸錢,如果係入市綁死咗,唔捨得斬,就講都無謂,我無謂推介股票嚟累人啦。

今年我做投資唔會亂嚟, 主要都係穩守突擊,現時我唔睇好香港,反而美國、日本等市場值博率會高啲,雖然呢啲市場都處於調整當中,但相對狀況好過香港,呢啲市場出現反彈時,部分股票會彈得勁啲,甚至有上升勢頭,例如facebook出業績創歷史新高,而Google母公司Alphabet上星期出業績都逆市升,可見好股可以跑贏大市,再者,美國市場選擇多、市場深度足,資金寧選美國都唔揀新興市場;日本市場因應日圓睇跌,所以股市趨升,但受環球市況牽連,加上近期日圓Chok,股市波動性都好大。

Kitty: 港股有乜陷阱要避開?

祝: 受人民幣貶值影響嘅公司,特別係持有美元債同港元債,而收入係以人民幣為主嘅,如果現時持有就最好沽晒佢;另一類係受中國限制外匯、唔畀人民幣流出所影響,同人民幣消費者有關嘅股份,亦千祈唔好掂,就例如濠賭股、保險股同埋貴價品牌股喇!

彩兒: 上星期好多股友見友邦(01299)股價3字頭即時掃貨喎⋯⋯

祝: 咁就死梗啦,依家中央閂閘,限制內地人以銀聯喺香港同其他地區碌卡買保險,每次交易上限係5,000美元(約39,000港元),同之前中央打貪,對濠賭股嘅影響同樣咁大,相信佢會不斷收窄資金流出嘅灰色地帶,估計日後老百姓帶人仔出國消費都一定會被收緊,所以依靠銀聯卡消費嘅公司就會遭殃。

Kitty: 其他資產你又點睇呢?

祝: 油價走勢受宏觀措施影響,點會估到OPEC(石油輸出國組織)幾時增產或減產啫,貪平入市冇用,油價係見咗底、有起色先會知道谷底過去咗,商品不嬲都難以估計,只可順勢而行。另外,我都唔睇好金價,主因環球經濟現時面臨嘅係通縮,而唔係通脹,以前有通脹時,先推動投資者買金保值,加上黃金供應量可以好多,開採供應量唔似鑽石咁少。如果想避險,最Work嗰招永遠都係買美國債券,08年後都離唔開佢,抗跌力強贏通街,雖然十年債券得2厘息,但人跌佢唔跌就贏晒啦,用黃金避險唔Work㗎。

彩兒: 金管局總裁陳德霖話過,如果炒家要拋空港股去推高利率,係要動用以千億計港元嘅「彈藥」喎。

祝: 彩兒,依家最緊要持盈保泰,因為都唔知要等幾耐個市先可以見底,連見底未都唔知,都係估估吓咋,最終都係要睇經濟數據有冇改善,仲要暫時都未睇到。啲官話人哋狙擊香港係唔會得手,只係廢話嚟啫,始終經濟一路下滑,啲錢不斷流走,總有弱點畀人攻擊。佢話炒家要用咁大量嘅彈藥,係冇計及槓桿啫,就當係資金成本抽升喇,啲對沖基金規模係好大㗎嘛,仲大過香港外匯儲備,你點同人鬥?你諗吓,最大嗰隻,Ray Dalio有成1,200億美元,另外有唔少係200億美元左右,而索羅斯主要係管番家族資產,反而唔大,若然呢班基金同一時間做世界,力量好大㗎。

Kitty: 好多人都諗緊現今大環境下買啲乜嘢先可以印印腳,唔使畀佢嚇到晚晚失眠。

林: 估計人民幣首季會維持弱勢,如果揸緊人民幣而又太擔心嘅,都可以轉走佢先,不過個人認為唔需要太悲觀,因為佢10月將會入SDR(特別提款權),屆時會有大需求,近期係人民幣離岸市場成為新戰場先比較波動,相信未來大幅貶值空間唔大,有4厘息袋嘅定存都博得過!今年中國經濟前景會呈先低後高格局,經濟數據舊年第四季先開始改善,大家仲等緊兩會開,估計以上因素要3、4月先反映到,第二季人仔會企番穩。

彩兒: 我想搵一啲穩陣嘅股份嚟中長線揸,暗瓦底儲番筆用嚟做嫁妝啊。

林: 恒指估值吸引,一眾藍籌股股價處於低位,如果係中長線投資者,可考慮藍籌龍頭股,但因油價仍然疲軟,應避開相關股份。因應人民幣同港元匯價持續波動,建議穩健型投資者選擇與中國關連性較低嘅股份,好似香港收租股領展(00823),旗下商場租約收入穩定,股息率不俗;而公用股,好似中電(00002)、電能實業(00006_等,即使一月大市下滑,佢哋抗跌力強,股息又唔錯,值得諗諗。

林: 至於認為中國概念股有前途嘅股友,可以注視受惠於兩會推出政策嘅股份,而支持新經濟轉型、冇咁受經濟放緩影響嘅騰訊(00700)可以係首選;另外,中移(00941)受惠4G項目盈利回籠,亦係唔錯嘅選擇。如果係有冒險精神,可以留意舊年跌得較殘嘅內地消費股,例如中國旺旺(00151)同康師傅(00322)等,因應業績基數較低,可以博一博。

Kitty: 孖妹同大家一樣好驚班大鱷,佢哋仲講到明話要狙擊人民幣、港元等亞洲貨幣,但係中國有成3.3萬億美元外儲,想沽冧佢又邊有咁易?

林: 咪係!新年流流,唔好睇到咁黑暗先得㗎!我睇法傾向正面,人民幣有波幅係正常,但拆息都冇大升,未見有行動喎。對沖基金要做沽空都要成本,香港資金自由流出流入,自動調節機制一向行之有效,有資金流出好正常,到時息口又會拉番高,吸引資金流番入香港。再者,機制安全性喺金融風暴之後強化咗好多,對沖基金想沽空都要用到極高成本,有大量錢先做得,唔係講咁易!我估計係部分投資者係借港幣兌美元嚟炒股,所以旨在放風做低個市,一箭雙雕!


來源 source: http://hk.on.cc
鍾意就快D Share啦!