凸肚相暴光
陀住 3個半月猴 B的關心妍，已經開始見肚。
真面目
家姐有喜 陀 3個半月猴 B 下月停工養胎 關心妍飲奶奶花膠湯谷肥
09年與金融才俊楊長智結婚的關心妍，過了近 7年二人世界終於有好消息，週三（ 3日）宣布陀住 3個半月猴 B。
7月尾先到預產期，但始終係第一胎，全家都非常緊張。老爺奶奶同關媽媽輪流整補品，花膠湯燕窩唔貴唔飲，難怪話咁快肥了 7磅！有老公養又有屋企人照顧，關家姐話下月就開始停工，安心養胎。咪仲好命過陀住巨肚都要出騷嘅陳茵媺？
進補肥 7磅
雖然現今大把高齡產婦，不過關心妍 36歲先陀第一胎，真係要小心照顧。關心妍爆老公知道終於做爸爸後開心到喊，得一粒仔的老爺奶奶更加緊張，不斷幫新抱進補。
陀住 3個半月猴 B的關心妍狂食補品養胎，現時已重了 7磅，「我好俾心機谷肥自己，𠵱家已經 107磅，重咗 7磅都算 ok。奶奶每星期要我飲花膠湯，又開始食燕窩，我都好乖有食！有時口淡淡想食糖同零食，身邊都好多『懷孕警察』唔俾我亂食嘢！」
推登台騷
暫時未知猴 B性別，關家姐除了努力谷肥自己同個胎，身體唔算特別強壯的她更計劃下月停工，避免操勞，「過完年等我做埋隻新碟，應該四個半月左右會停工，因為個肚會愈來愈大，都要停幾個月休息！都推咗幾個登台騷，老公唔想我去太遠，佢好擔心！」
關心妍陀 B初期幾乎日日嘔，嘔足成個月冇胃口，當時接咗好多聖誕新年騷唔推得，又唔可以公開，惟有解釋患上腸胃炎。其實錢幾時都有得搵，梗係安胎大過天
馬騮仔輪住嚟
關心妍宣布陀猴 B，其實今年仲有唔少女星造人成功，猴 B陸續有來呀！
採訪、撰文：娛樂組
來源 source: http://hk.face.nextmedia.com
|
鍾意就快D Share啦！
|
|
|