停播倒數3日群星別亞視
尚餘兩天，當踏入4月2日零時零分，亞視的59年電視廣播歲月便正式畫上句號！回顧過去逾半世紀，亞視曾有過輝煌時代，當中打造出不少經典劇集角色，亦捧紅過不少演藝名人，當中包括上世紀70年代叱咤風雲的「大俠」徐少強、家庭主婦「殿堂級偶像」方任莉莎、「跳船」從政的「哪吒」方國珊，以及有智慧、有身材的亞姐代表葉玉卿。亞視在本港電視史留痕，就如斜陽落下，但永留餘暉！
葉玉卿豪言「炸亞視」
1985年參選亞姐並得季軍的葉玉卿，在亞視一待就是五年，演出超過廿部劇集包括《中華英雄》中飾「潔瑜」等。對於亞視熄機在即，卿卿受訪說：「聽到亞視熄機真係可惜，亞視係我第一份工，呢五年係好好人生經驗，亦都係訓練演技嘅大本營，我一出嚟已經做女主角，真係要多謝邱德根畀機會，我做得唔好，但比起好多人幸運。當時邱德根好親切，滿約前都會逐一同人傾，就好似爸爸咁，電視台人工唔高，但好自然會留低。」
卿卿笑言當年為增加收視，曾想出驚天動地的方法，她笑說：「有人提議要炒咗阿邊個，我就話我有個最好嘅方法，就係炸咗亞視，成間電視台炸咗，咁就可以置諸死地而後生，可以重生！」卿卿寄語亞視的新知舊雨：「諗番呢個想法（炸亞視）都唔係錯晒，每件事都有因果，可能經營手法或者老闆等化學作用唔啱。可能冇咗係可惜，但係從好嘅方面諗，將來當有間新嘅電視台，如果有新嘅團體或老闆，可能會有更加好嘅節目，對觀眾係好事，唔好咁傷心。」
徐少強借將被失蹤
徐少強1977年以邵氏演員身份，獲借將到麗的電視（亞視前身），先後拍攝電視劇《大丈夫》及《天蠶變》，後者更令他紅遍香港及東南亞，當時《天》劇邊拍邊播，劇情竟交代「徐大俠」修煉天蠶神功破繭而出，容貌有變，由顧冠忠接棒擔演，成為電視史上一大佳話。
當時徐少強被冠以花名「失蹤大俠」，又被指酗酒失場。近日他受訪將當時情況娓娓道來：「良心講，如果飲醉一、兩日都起番身當時我有好多工作合約喺手，而我本身只係借將嘛，麗的見劇集反應空前熱烈，臨時決定加多三十集，檔期上我配合唔到，大家有啲拗撬，當佢哋決定換人，我就推薦顧冠忠囉！」他坦言難忘為麗的拍劇，台前幕後相處如大家庭：「大家日對夜對，感情似足屋企人。而麗的嘅出品毫不輸蝕，大家拍嗰陣好搏命，好似我套《大丈夫》就打到對面台震晒。」
方太：冇觀眾要收皮
1979年方太開始為麗的電視婦女節目《下午茶》教烹飪，後來獲監製賞識，讓她「發版」主持節目《午間小敍》，奠定了她「師奶偶像」地位。談到當初主持直播節目的蝦碌事，她受訪時笑說：「當年第一次上電視教煮餸，仲要係直播嘅，點知現場撻極都撻唔着火。有工作人員要喺地下爬過嚟睇個爐發生咩事，我就對住螢光幕同觀眾講唔好意思，仲問佢哋有冇試過睇烹飪節目撻唔着火，足足捱咗7分鐘先搞掂。」
受命主持《午間小敍》時，監製向方太表示：「畀3個月時間去試，冇人睇就一齊死。」壓力之大可想而知。有晚方太心情不好，錄影時爆肚表示若有觀眾的話，麻煩大家畀反應，想不到翌日已收到一大袋影迷信。談到成為不少太太心目中的偶像，方太笑謂：「我知，依家都有後生仔跑嚟同我講，係食我啲嘢大，我都覺得好開心。」
方國珊被摑淚灑
現為區議員的方國珊當年第三期亞洲電視藝員訓練班畢業，1986年拍攝亞洲電視劇《哪吒》飾演哪叱一角為人認識，她接受訪問時憶述拍該劇的難忘事：「當時要拍火爆戲，可能手足落火藥落得較重手，爆炸效果強勁，爆到連我條褲都燒着埋，當時好危險，到依家都好難忘。」另一難忘作是《仙女多情》，初出茅廬的她比較頑皮，在片場發出噪音被正在度招數的武指（徐二牛）摑了一巴，淚灑當場：「頭兩年好唔開心，覺得佢恰新人，覺得佢唔係好人。事隔多年，其實覺得呢個係大體會，呢一巴係摑醒咗我，令我人生好大反省，係人生好大警醒同磨練。學懂了要尊重不同嘅場合同尊重每一位工作中嘅人員，佢嘅一巴掌，讓我獲益不淺。」
面對亞視倒數停播，方國珊寄語：「當然好難過，亞視員工全部好重情。人生有悲歡離合、喜怒哀樂，有光輝、有璀燦，亦有衰落之時。無論喜與哀，大家都要互相勉勵。人生唔會一帆風順，只要大家堅強就可以面對。」對於亞視品牌會離開香港，她勉勵大家要與時並進。
車保羅患「疱疹」秘撈
車保羅於1981年加入麗的電視，曾演出《IQ成熟時》及《對對糊》等青春劇，擁有6呎3吋高瘦身形及卡通五官，令他廣為人認得！他自爆最難忘的「亞視回憶」是曾患「疱疹」：「當年我私下接Job去菲律賓拍戲，要去一個月，為咗唔想有人打攪我，我同亞視講我有疱疹，跟住去咗菲律賓幫許冠文拍《鐵板燒》，以為收到片酬又有份糧，點知返港後穿咗煲，稅局追我，亞視又扣我一個月糧，最後發現原來係Sally（葉蒨文）訪問時爆咗同我拍戲，大家都唔好學我呀！」
吳毅將銘記知遇之恩
藝人吳毅將於1982年加入亞視訓練班，曾演出多套劇集包括《皇家檔案》系列及《碧血青天楊家將》等，他接受訪問直言：「冇亞視，冇吳毅將！」他回想入行不久便被選中做男主角，但因踢波斷腳休息整年：「抖到成個人肥晒，人哋仲要唔要你都成問題，但公司照簽我做基本演員，好有人情味！到後期我出去拍戲，都冇忘記母台，學到點幫人。」
吳毅將拍過不少動作戲，最難忘駕車撞斷攝影師腳：「嗰刻好驚以為撞死咗佢，好難受，對佢家人作出咗賠償。」他又讚當年台前幕後非常團結，收工唔願走，希望打破慣性收視。
陳維英 周麗娟不捨「老友記」
70年代加入麗的電視的陳維英及周麗娟，曾主持節目《哈囉，夜歸人》及《貓頭鷹時間》，最近周麗娟由美國返港見證歷史，兩人回想當年一眾台前幕後感情如兄弟姊妹，周麗娟說：「我哋喺度成長，每個人都用心用力，過咗37年仲會成日聚會。」陳維英大讚亞視充滿人情味：「如果冇咗（亞視）好似冇咗個老友記咁！但起碼我哋精神、感情會一直落去。」
徐寶鳳幸運劇接劇
活躍於80年代的亞視藝人徐寶鳳曾拍劇《再向虎山行》及《鐵膽英雄》等，她表示當年於藝員訓練班出身，很幸運拍到不少出色劇集，有許多快樂回憶，對於亞視時代將告終，徐寶鳳直言難過及不捨：「我心裏面好忐忑不安，我想亞視重開，喺度祝願亞視台前幕後都有美好將來。」
文：影視組、專案組
|
鍾意就快D Share啦！
|
|
|