真人騷
藉着《 FACE》說再見 謝安琪小休前終極專訪：「唔介意係唔係天后！」
來到最後一期，少不免帶着離愁別緒，尤其是終極號的主角遇上演唱會後即將暫別樂壇的謝安琪。
《 FACE》的最終回是逼不得已，謝安琪之所以要放這個悠長假期則是一種選擇：
一切從山林道起步，也借着〈山林道〉這首歌來一個話別：
所以我說，我最捨不得這個欄目的是，不論紅定奀、不論一線定六線，每次結束那兩三個小時的訪談，離開時我總會有些得着。
這一停，還是天后嗎？還有人聽你唱嗎？歌迷還記得你嗎？價值還在嗎？疑問再多，其實答案只有一個，謝安琪說她用了好幾年才發現，雖然這個圈人人都是這麼做的、人人都在往上爬，其實重點是：「紅唔紅、賺幾多，原來我唔介意，我介意嘅係我嘅歌紀錄咗一啲嘢，而人哋無！」
謝謝《 FACE》，讓我在過去十年也紀錄了一些，而別人沒有。
謝謝謝安琪，和每一個曾經有緣相會的受訪者，原來那些得着袋落落就係自己嘅，別人搶也搶不走。
可能係全宇宙最短嘅演唱會 Tour！
人 tour佢 tour，叫得做 tour，去勻中港台美加澳紐閒閒哋唱返三五十場是常識吧？不過呢個係一直不太按樂壇常規出牌的謝安琪，小別樂壇小休前的最後一場演唱會，竟然係破紀錄嘅……短。從澳門拉開序幕，第二站香港已經係尾站。本來的十多場十多個城市內地站因為政治因素搞唔成，而香港站飛賣得再好，亦都冇諗過加場，因為：「呢個社會氣氛下，我哋冇辦法大鑼大鼓情緒高漲地宣傳演唱會、宣布加場！」
內地演唱會 hold起咗一共幾多場？個理由係乜嘢？
超過十場，牽涉超過十個城市……詳細嘅理由我就唔交代喇，因為好多原因……唔重要啦，總之就係 hold起咗……其實又唔係唔重要……以我呢個年紀嘅歌手嚟講，內地巡迴叫咗去得多去得遠，其中一站係哈爾濱咁遠。點聯絡出嚟呢？就係當年做過大學生義工活動，去咗好多二線城市。當時做活動、之後聯絡籌備演唱會，同工作人員同當地樂迷之間建立咗感情……我覺得可惜嘅。現在中港關係緊張，所有人去內地工作都要揹住包袱，都要揹住批評，俾人講到咁樣就係冇骨氣、就係賺人仔。某個層面你可以咁睇，但唔排除呢啲工作真係有佢意思。尤其係我，我啲歌都有好多文化價值喺裡面，我嘅歌迷好多係好奇、係 open係受過一定教育嘅大學生，有呢一班樂迷我係幾珍惜嘅，但係佢哋現在落了空……其實去內地工作唔係下下都講掘金㗎！
除咗內地搞唔成，你話香港演唱會市道都好差？
我唔係淨係睇自己銷情，反而我呢兩場演唱會賣飛叫做去幾快，點解咁樣都唔加場？係因為我哋唔想承受呢種壓力……就算我嘅演唱會唔係淨係歌舞昇平吃喝玩樂，都始終喺個氣氛下，做娛樂工作好多嘢影響心情，再大鑼大鼓宣傳賣飛宣傳演唱會，我哋情緒都唔會太高漲……雖然我哋本來就唔係大鑼大鼓嗰種人，本來辦一場演唱會都係想互相支持……
佔中打後，有冇計過自己收入實情少咗幾多？
我冇計過，我都冇介意過，老實講，反正呢個演唱會以後我都會休息……
會休息幾耐？
好耐㗎！唔係為咗生仔，可以生其實我又唔介意……其實我想休息好耐，但係要叫停自己工作實在太多嘢處理。幾年前爆肺時身體狀況最需要我停，我唔停唔係因為冇得停，係我選擇唔好停住。我嘅性格就係咁，愈係太壓力、愈係俾新聞針對時退下來，嗰個感覺似係我避走，如果咁樣去休息，心情都唔會好，再行出嚟信心都唔會高。你諗下？敗走匿埋喎！我好坦然，唔介意俾大家見到自己最真實一面，即係生完 BB時好肥都照出嚟唱歌，身體唔好都努力唱歌，即係別人口中嗰種好「貼地」嘅人，唔係要做 fantasy，係要話俾你哋知我都有困難，都有唔完美。其次仲有一樣嘢要計住，係我嘅小朋友嘅年紀，佢性格同價值觀嘅形成就係呢段日子，唔係淨係開心同唔開心，差唔多喇，係時候俾多啲注意力佢。我唔想到佢十二、三歲，已經唔需要我陪伴嘅時候先至走嚟後悔。
可能係唯一不怕失去光環的天后！
農曆年間，身形突然爆脹。宣傳演唱會，又突然宣布唱完就會小休最少一年。正常人都會咁諗，仲唔係有咗第二胎？我最喜歡謝安琪這種坦蕩蕩的受訪者：又唔係未生過，就算係去生仔，又有幾咁閒？被後起之秀取代？即管放馬過來！如果我唔志在做天后，你又奈得我咩何？
呢個行業，想停唔係身不由己咩？
以前我唔明，最近搞清楚一樣嘢，原來呢十年，我無愧我做過嘅歌。我知自己未必賺好多錢，未必係最受歡迎，但我希望我嘅唱片珍貴在佢紀錄咗一啲嘢，而人哋無。原來呢樣嘢對我最緊要，而唔係要紅、要高高在上、要喺樂壇爭一席位，所以我可以停，因為我終於搞清楚我並唔介意。
曾經呢，你介意過？
因為呢行人人都係咁做㗎嘛！呢行係咁樣界定成功㗎嘛！我知自己想點，但係唔係好似𠵱家咁清楚。當年就算〈囍帖街〉嘅成功我都計唔到㗎！我邊似得呢行啲人咁叻，推出一首歌會聞到錢味呢？
所以你係傳統媽媽？兒子成長自己不能放手？
又唔係，係我睇到自己比起我老公更適合……因為呢個時候我嘅小朋友開始自我，會開始介意人哋鍾唔鍾意佢、佢會諗人哋鍾意佢係唔係因為爸爸媽媽係演員歌手……佢有時會問我，人哋真係鍾意瞻瞻（張瞻）定鍾意我同張繼聰？呢樣嘢可以冇答案，我可以話「我點知啫」？但係我會答佢，佢本來就係一個 friendly嘅小朋友，無論朋友仔點解會行埋嚟，重要嘅係你點對待人，佢哋仲想唔想繼續做你朋友仔……
所以呢一刻真係未懷孕？咁有冇諗過生多過？
真係冇，雖然俾人傳過唔只廿次，雖然個個當我休息一年都係為咗生仔，但我真係唔係有咗。我冇所謂喎，又唔係未生過！我都係獨女，其實我又真係唔覺得一個小朋友成長有幾慘，起碼我嘅成長我唔慘。
好多人覺得生多個最大好處係當有起事上嚟有人陪伴。咁陪你嗰個人係邊個？
當然係張繼聰我喺好多時俾人感覺好硬淨，但係大家只係睇到我硬淨嘅一面，其實我都需要支持，而我嘅支持多數來自張繼聰。佢就係咁犀利……我哋結婚呢九年，佢成長得好快。我哋結婚時，我覺得佢思想細過我好多，但係我鍾意佢嘅正能量，佢份人好開心、佢有好多朋友、佢好好奇、睇好多書。識佢時我真係覺得佢好得意，點解佢啲朋友咩界別都有？個個都係當佢好兄弟、個個都有經歷？我冇諗過結婚後呢個人成長咁多，可以由一個陽光男孩子，因為同我結婚承受咁大壓力……
可能係香港地最幸福的女歌手！
訪問尾聲，謝安琪說不能不提新歌〈山林道〉，因為從錄第一首歌〈姿色份子〉開始，一切都源於這個山林道的小單位……問題來了，明知間公司細、明知自己係最賺錢一個，話停就停又算唔算係自私呢？謝安琪幸福在，唔只老公亦有老闆（周博賢及夏森美）支持退下來，呢樣嘢，其他天后恨都恨唔嚟！
你係話，最多新聞針對你兩公婆時張繼聰成長最快？
佢唔係變咗第二個人，而係由一個思想好年輕嘅人，變咗一個講嘢有份量、會得到我尊重嘅人。例如我今次想休息，佢俾咗一個 comment我，佢話一個人最叻唔係可以做到幾多嘢，而係佢有能力有眼光對幾多嘢 say no，只在真正值得嘅嘢上將自己能力發揮到最高。係㗎，我真係咁，啲嘢游埋嚟我就樣樣都想做，樣樣都見到佢意義，張繼聰比我高在佢睇得到，有啲嘢係好，不過唔係𠵱家。仲有一樣係佢情緒，以前張繼聰有火，會嬲到要掉爛電話，啲怒氣係要發出嚟。以前係人都知佢發人脾氣，但係呢九年佢一樣有睇法，但唔會嬲到要嚇死人要爆囉！
就算俾人寫得最衰時都唔會爆？
佢俾人寫到咁當然嬲，但係無人睇到佢嬲。因為佢覺得要專業，覺得做嘢唔應該帶住情緒。我覺得既幸福亦都傷心，佢收得好埋，冇俾我睇到佢當時撐得有幾辛苦……你同佢一齊生活，唔使去到喊出聲、唔使去到瑟縮一角，都會知佢狀態唔好。佢俾我睇到嘅只係唔好，實情佢係辛苦到試過寫遺書，趁住我瞓緊時，諗住一死了之……當時我都俾人攻擊緊自顧不暇，佢喺最差嘅時候自己都困擾嘅時候，都支持緊我開解緊我。
個遺書內容係？
老實講我冇細心睇，我淨係覺得好詫異，一個表面上好平靜嘅人，已經諗到呢一步……我以為係我頂唔到，原來佢比我更差，我淨係覺得好沉重。諗返轉頭好感恩，我哋一齊捱過咗最辛苦嗰段日子。我好感激，一覺瞓醒，佢留返條命成為一個更好嘅人，𠵱家望住佢，我嘅感受更複雜。
其實除咗學業，生命中遇到嘅難處一浪接一浪，你有冇信心，你哋嘅仔識得應對？跨唔跨得過呢？
我成日都諗呢樣嘢，我呢個年紀好多人朋友同我諗嘅一樣，當大人對人生對社會都冇信心時，到底點樣培育下一代去堅強去應付呢？唔好講到去戰勝，剩係應付已經好難，真係好難……係期望佢喺溫室成長，定俾佢跌下踫下呢？我不嬲都係，俾佢撞下板俾佢受下傷，放手俾佢行，我想佢自己磨練。媽媽都有壓力、都要頂，最重要都係預計到人生就係咁，其次呢，最緊要有人陪……冇人陪咪搵人陪囉！喺呢個世界就係要搵方法生存！
休息完，然後呢？
講真，我𠵱家有一份唔知邊度嚟嘅平和。然後係點我都唔會太擔心，搵少啲咪搵少啲囉，有第二啲女歌手跑出咪跑出囉，其實呢唔知邊度嚟嘅平和，我知，主要都係嚟自張繼聰。
後記有期
明知道在《 FACE》後會有期的機會應該不大，不過還是希望還有機會能寫，希望後記有期。
從知道《 FACE》終結到現在一共五期，謝謝每個受訪的藝人、謝謝每個細心讀到後記的讀者、謝謝每個告訴我不要放棄希望的人。
十年以來，學到的不能盡錄，其中一個最重要的，就是：不用怕，只要肯走、只要帶着希望，路就在前面！
撰文：朱小博
攝影：范仲良
化妝： KHAKI YAN
髮型： Eve Chiu@Queen’ s Private I
服裝： Lane Crawford、 JOURDEN
飾物： ATELIER SWAROVSKI
|
鍾意就快D Share啦！
|
|
|