真人騷
大台當透明 被失蹤兩年 41歲鄧健泓： TVB根本唔記得我存在！
對上嗰次拍劇係《使徒行者》，對上嗰次螢光幕露面係兩年前信貸廣告雜誌，唔講我以為兩年前鄧健泓巳經係自由身。
直到年頭打電話去約訪問，至知佢同大台份約今個月中才屆滿：「麻煩你哋等多我兩個月，如果佢哋有心玩，真係會玩死我！」
同大台關係急轉直下，外傳原因有兩個版本，其一當然是陳志雲出事，昔日迷雲黨一概失勢；其二，則是去年辭演《潮流教主》，拒絕同龔嘉欣舊情被擺上枱，得罪大台。
鄧健泓笑了：「我知自己咩位，我都未去到可以因為唔聽教聽話俾人雪嘅位，冇工開呢兩年係因為佢哋根本唔記得有我呢個人存在……」
出道二十年，演戲唱歌主持都叫做有過代表作，咁大個人都見你唔到？好出奇咩？其實擺喺大台又的確唔出奇，正所謂朝中有人好辦事，呢啲係叫做成也志雲，敗也志雲呢？
從 07年開始被人當成迷雲黨，人人知道他叫陳志雲做 Honey，三月中滿約離巢，鄧健泓一邊冒着被寫成翻兜的危險現身支持陳志雲宣判，一邊選擇在港台（陳志雲現任商台首席智囊）重新開始，以獨立身份演舞台劇，做製作人，他說一切是真的刻意：刻意在想所有人除咗副有色眼鏡，我唔係黃馬褂，我靠嘅係自己！」
只要堅持，只要相信！
女友石詠莉隻碟攞咗 IFPI兩個獎？
係，一個係全年十大暢銷唱片……其實佢係 Top 3、 Top4㗎，另一個係十大暢銷女歌手。舉個例，譬如話容祖兒 15年出咗兩隻碟，佢哋會累積兩隻碟銷量……但係我哋出咗一隻碟咋！
笑得好自豪喎！係唔係覺得吐氣揚眉？
係！ Sukie同我情況唔可以話相似，但的確有雷同。我一直覺得佢唱歌好動人，一把咁好聽嘅聲應該要多啲人聽到，我想人哋可以忘記以前嘅嘢，由把聲開始重新認識佢……當然一開始冇諗住自己俾錢，諗住去敲下唱片公司門先啦……但係得番嚟嘅回響都係信唔過、有啲說話令人唔舒服，都係覺得以前嘅 Freeze太多新聞。唔緊要，我都學到嘢嘅，呢幾年你問我學到啲咩，就係堅持，就係要用自己雙手去創造機會。呢啲機會唔係令你飛黃騰達，但做咗之後一定有嘢發生，一定會引領我哋去一啲地方……去到邊發生咩事冇人知，但係你唔做，就肯定冇嘢發生！
你同我講咗兩次「相信就會有」，點解成日掛喺口邊？
睇本書《 Secret》睇番嚟，人要正能量，要信，至會有好事發生㗎！
但人生總有啲時候，覺得個天玩緊你，根本信咩都冇用？
有！梗係有，我試過 06年離開 TVB，去大陸拍劇又收唔到錢，我當家㗎，要供妹妹讀書㗎，我要養媽咪冇爹哋㗎！嗰陣時好辛苦，最難過……再前小小一樣唔好過，唱片約冇咗， TVB又換咗經理人，嗰年連原子鏸都同我分開，一次過變咗三失青年。
爸爸喺你幾多歲拋妻棄子？
我 22歲，佢去咗南非，跟住識咗第二個女人有咗第二頭家……嗰年我仲喺外國讀緊 Fine Arts，本來成績好到未畢業 University of Calgary同 University of Alberta兩間大學已經提早收咗我。但當屋企冇咗經濟支柱，我就要返嚟做一家之主，入咗 TVB做兒童節目（參加 96年新秀）……其實我坐緊學行車嗰陣時，佢同媽咪都已經分開咗，我嘅成長畫面不嬲都冇爸爸。
呢種成長對你今時今日有咩影響？
絕對有，所以我最憎冇責任嘅男人，我就係大男人……
大男人到點呢？
出街食飯我一定要做俾錢嗰個，冇錢咪唔出街囉……大嘅，我係嗰啲唔想女朋友拋頭露面嘅人。
蜜糖功能係療傷！
但係你個個女朋友都做呢行，點會唔拋頭露面？
係，但係我嘅意思係唔鍾意佢哋太暴露，太性感。
咁大男人，當你事業失意時，會唔會好容易俾女朋友無心一句踩親條尾？
有㗎，我以前脾氣差過𠵱家好多，尤其係冇碟出嗰陣時，女朋友講一句啫：「阿邊個邊個唱得幾好喎！」我就會妒忌，就會嬲：「好好咩？𠵱家我唱得唔好咩？做咩啫？好鍾意佢咩你𠵱家？」
有冇咁樣搞到分手？
我歷屆女朋友大家都識， Marsha（原子鏸）， Selina（李施嬅）， Katy（龔嘉欣），佢哋個個都係好女仔，某程度上我哋係因為了解而分開。再講人大咗，需要嘅嘢會變，當大家覺得都俾唔到大家需要嘅嘢，就會決定分開。
某程度上條路行到𠵱家都係爸爸唔理你造成，憎唔憎佢？
我嬲佢就梗嘅，當我要幫妹妹交學費，當我唔識填報稅表，亂填搞到啲稅好貴嘅時候，當我好貧乏嘅時候，我真係好憎佢。我冇同佢聯終，唔想知佢𠵱家點，如果有機會見到，佢唔好大聲過我，因為佢真係冇資格大聲過我……但我唔想有咁嘅機會，根本就唔想見佢。我真係唔知佢咩心態，我真係好想知佢𠵱家見到新嘅仔女會唔會諗起我哋……我唯一肯定，佢唔正常！係正常嘅男人就唔會咁！
記者行家話你寸，又有電視台 PA傳出嚟你埋位時會叫人「唔好阻住你」，知唔知自己曾經俾人呢啲感覺？
我唔知……好坦白話俾大家知，我拍劇嘅時候係好少同人傾偈 social， social唔係我嘅工作崗位，講好對白演好戲係我基本責任。我唔會吹水係真嘅，但會唔會叫我埋位時我話俾人阻住？對唔住！我好早已經準備好，你問任何一個同我合作過嘅導演同演員，我唔會咁扮嘢到最後一刻都話自己情緒未到…… sorry，我知自己咩位置，我只會上場盡力做好。
咁多年，你都知你自己咩位置？
梗係知喺 02、 03年頭唱歌嗰陣時，我記得有一次自己做得最唔啱。當年第一次上《勁歌》，我好想同女朋友分享，但係當時唱片公司宣傳叫我唔好、太多記者……我一句話：「咩事吖？我鍾意吖！」我冇諗過佢感受吖，你明唔明？
好多傳言就係咁嚟，你有冇諗過一句「我鍾意吖」傳出去係點？
所以係真嘅，以前我真係唔多記者朋友幫我，我唔係寸，但係我真係會黑面，鍾意就鍾意，唔鍾意就係唔鍾意。我𠵱家都唔係做得最好，但係我的確𠵱家學識咗去諗下人哋感受。
唔好再話我迷雲黨
做歌手年代、跟志雲年代，你覺得你算唔算一朝得志語無倫次呢？畢竟得罪宣傳、話志雲係 Honey都係事業高峰時講出口？
我承認我未必做得最好，但我的確覺得當你最好嘅時候，好多人都想你死……所以呢啲時候特別多是非。 07年我由出邊返去 TVB，陳志雲知道我個人亂晒章而幫我，我都知道咁樣惹嚟好多閒言閒語，但係我真係要講多一次，我真係冇叫過陳志雲係 Honey囉！當時係查小欣俾咗八樣食物叫我揀，我話哈林大哥係辣椒，會令節目刺激、黃柏高係苦瓜，雖然苦澀，但佢真係幫到我、我話李詩韻係水，因為有情飲水飽，而蜜糖有療傷嘅功能，因為陳志雲重整咗當時最亂嘅我……好好喎！當日在場聽到嘅記者都冇嘢，完咗方力申仲打嚟讚我講得好好，點知第二日《蘋果》（日報）一句標題：「鄧健泓叫陳志雲做 Honey！」……所以都話，你哋要整死我，真係好容易！咁多年，我肯定試過喺記者面前黑面，但你哋要知個原因。不過亦都係因為我咁多年好過，亦都唔好過，令我明白一個道理，你對人好係應該，但係人哋對你唔好，並唔係你嘅錯！
所以你有兩個事業高峰，一個係 Paco俾你，一個係志雲俾你？
兩樣嘢嚟嘅！ Paco嗰個年代係靠我自己能力，當年佢搵咗三個有經理人合約嘅藝人試音唱一首主題曲，林峯、葉璇同埋我，係聽完我唱，佢話唔要我唱一首主題曲，要幫我出一隻碟！嗰日我真係開心到爆……陳志雲唔同在，係我唱過嘅歌、拍過嘅電影大家都唔記得，淨係記得黃馬褂，淨係記得我係迷雲黨……
講落係有啲慚愧，真係要俾你提一提，至記得你除咗迷雲黨都有其他作為……
係㗎，我係由零開始，由做兒童節目、旅遊節目，自己賺番嚟我第一隻唱片合約㗎！我所有努力都冇人記得，淨係記得我係迷雲黨！
陳志雲經歷過咁多，有智慧咁多，你有冇問佢，當全世界除咗你係迷雲黨乜都唔記得，仲可以點？
佢唔使講，我喺佢身上已經學到好多。唔需要理人哋點講㗎，做好自己因為你嘅價值唔係出自人哋把口，你嘅價值你自己至知。
你同無綫嘅關係，幾時開始急轉直下？係因為陳志雲離開，定因為你分手後唔肯同龔嘉欣再演情侶？
我未去到一個位置令佢哋覺得我唔聽話，係根本呢幾年（陳志雲離職後）佢哋就唔記得我嘅存在……
所以係真嘅，朝中有人好辦事，你仲唔係成也志雲，敗也志雲？
我唔可以咁講，敗也志雲呢句我唔同意， 07年上返軌道我係靠陳志雲，但亦都係咁大家淨係記住我係迷雲黨。所以 11年我好大膽去接受一個 40分鐘嘅獨角戲《獨坐婚姻介紹所》，呢個挑戰我唔接受，就真係抵人哋覺得我一世都要靠人哋先可以成功，抵人哋戴住有色眼鏡。我就係要人哋除咗副眼鏡……我唔會話自己時候未到成就一番大事，我淨係想俾人知我係一個演藝工作者，我靠嘅係自己。
有冇打算同石詠莉結婚？
我未求婚，我唔覺得我會搵到一個更適當嘅人。
之前幾任前度呢？唔夠適當？
都有嘅，原子鏸囉……嗰陣時我喊咗成年㗎同佢分手。佢話香港唔適合佢，佢話佢嘅世界更遼闊，而我嘅世界太狹窄，我哋兩個世界嘅人……我以前唔明嘅，大家明明喺一個地球，咩叫兩個世界？仲唔係扮晒嘢？但其實係真嘅……我哋分開咗十二年，儘管佢都係做舞台劇都會唱歌，我又係做舞台劇又係唱歌，但係呢十二年除咗《男親女愛》演員聚會，我哋從來冇見過面，原來我哋真係兩個世界嘅人。
高山低谷
新歡舊愛
告別後記：倒數之三
一張嘴，一支筆，一篇專訪，一次後記，影響力可能卑微弱小得沒人能察覺，不過我還是要寫，因為機會不多了，因為有些人俾人寫衰寫得多，值得還他一句公道話。
訪問鄧健泓，同事 L一聽藐嘴又藐舌，說試過公開訪問遇過他臭寸拒答：「我唔覺得我要答你囉！」，也聽過大台幕後傳言：「叫佢埋位，佢話唔好阻住進入情緒喎！」
我們都會因為別人一句話被人影響，但我要趁這個機會感恩這個工作崗位，讓我有機會眼見為實。在這裡，我要謝謝鄧健泓一離巢就趕來做我的倒數第三期專訪，也要謝謝他當知道《 FACE》即將停刊，兩次安慰我不要灰心、不要為前途擔憂，因為「相信就可以」。
撰文：朱小博
攝影：范仲良
髮型： Vince Pang@IL Colpo Platinum
|
鍾意就快D Share啦！
|
|
|