港姐蔡思貝是非多多，其中以緋聞多最聞名，當中包括羅仲謙、洪永城等，舊年佢被踢爆成功翻撻《狂舞派》舞蹈總監麥秋成，今年1月更暗認拍拖同居，雖然蔡思貝死口唔提戀情，係都話專注工作，不過戀情都有露餡嘅時候。喺今日中午12點左右，本報發現蔡思貝嘅愛郎麥秋成，揸住蔡思貝部車載女方去筲箕灣南安街一間電單車用品專賣店度，去到會合DJ朱薰嘅老公譚健榮，一行3人齊齊睇電單車。3人喺舖頭入面研究咗大半個鐘左右，蔡思貝全程都係做跟得女友，負責聽，百無了賴嗰陣就摸吓舖頭隻狗消磨時間，當麥秋成同譚健榮出嚟試車嗰陣，蔡思貝就好識做咁走去幫麥秋成拎住個頭盔，都好細心吓。之後麥秋成同譚健榮去試車，佢哋兩個上咗車後，蔡思貝就充當攝影師，用部手機幫兩男影相。麥秋成等人試咗一段簡短路程之後，個樣好滿意吓，佢哋放番低架車，傾咗幾句，就步行咗去附近食嘢。食嘢嗰陣蔡思貝同麥秋成坐一邊，譚健榮坐對面，3個人快食後再行番去車行攞車遊車河。麥秋成同譚健榮各自揸住架復古款嘅電單車，蔡思貝就揸番自己嗰架貼咗P牌嘅甲蟲車跟尾護航。喺出發前，麥秋成同譚健榮喺架車前面搭晒膊頭影相，當然，蔡思貝又係負責影。一行3人正式出發，蔡思貝今次身兼三職，包括：護航員、司機，以及攝影師。而呢位攝影師好盡責，佢唔單止喺紅燈停車時幫兩名鐵騎士影型仔相，當佢喺高速公路上開緊車嗰陣，都照樣單手控軚、另一隻手拎住手機，伸出天窗拍低麥秋成等人嘅英姿。相信因為蔡思貝要一心二用嘅關係，佢邊揸車邊影相時，明顯架車係有啲左搖右擺嘅，都咪話唔牙煙！揸揸吓譚健榮都好識做，讓個位出嚟畀蔡思貝跟住麥秋成，自己墮後唔做電燈膽。後嚟佢哋揸到去灣仔伊利沙伯體育館附近，諗住停低部車傾偈，點知遇着有交通督導員抄緊牌，所以佢哋又兜咗一個圈先返去泊車。之後譚健榮先行離開，蔡思貝揮晒手同對方講拜拜，之後佢就同麥秋成行咗去一幢唐樓，去咗一個疑似樓上cafe嘅地方繼續飲嘢傾偈。就蔡思貝一路揸車再用單手用手機影相呢件事，其實好有可能犯法，因為根據運輸署網頁中刊登嘅《駕駛汽車安全指引》（相關連結： https://bit.ly/1U6uFrS ）中提到：「為提高道路安全水平，政府實施新法例，禁止司機在車輛行駛時使用手提式流動電話，或其他同類無線電通訊設備。
由2000年7月1日起，司機在車輛行駛時，不論是否與他人通話，都不可手持電話，或將電話夾在頭及肩膀間。
由2001年7月1日起，禁止司機在車輛行駛時使用包括手提式流動電話的手提無線電通訊設備。
違規者最高可被罰款2,000元。」就算唔講罰款問題，始終道路使用者要顧及路面安全，（大吉利是一句）發生意外對大家都唔好，有人命傷亡就更加唔好，所以大家真係唔好學呀！
| 蔡思貝今日被發現跟住緋聞男友麥秋成試車，喺公路上仲不顧安全邊揸車邊用手機拍攝。（採訪、攝影：徐錦池、罼紹基） |  麥秋成揸住蔡思貝架車去筲箕灣 |  |
 麥秋成同蔡思貝去到電單車店會合譚健榮 |  悶爆嘅蔡思貝玩狗度日 |  麥秋成去試車，蔡思貝拎定頭盔跟尾 |
 |  開車前影合相，由冇入鏡嘅蔡思貝揸機 |  之後一行3人去醫肚 |
 |  出發時影 |  去到燈位，蔡思貝都照影 |
 後來伸手出天窗影，留意番，係雙手伸晒，而當時係綠燈要開車嘅 |  蔡思貝一直為麥秋成護航 |  譚健榮好醒目，試車後段已經讓位畀蔡思貝跟住麥秋成 |
 蔡思貝揸住架貼咗P牌嘅車跟住麥秋成同譚健榮試車，全程做跟得女友。 |
|
鍾意就快D Share啦！
|
|
|