噚日香港討論區就有個post，有人大呻俾個有婦之夫欺騙感情，仲聲稱「搞出人命」，又指當事人仲要係名人：「成年啦，佢每次都係叫我等佢...佢依家創緊業好忙，我有同佢講不如算啦，佢話唔係，叫我等佢返嚟...佢返嚟都有搵我，因為我鍾意佢呀，我冇咩所謂，其實6月嗰陣時我有咗，我冇話畀佢知，因為我知道佢一定會驚，同埋一定唔會俾我...男人係咪就係咁㗎啦，加上佢係名人，所以更加仆街？」樓主繼續爆料：「我依家好憎佢，我係咪應該開佢名？我驚我開咗佢名，佢會恨我。佢之前都俾過啲0靚模放過上枱，佢梗係話冇冇冇㗎啦，呢啲人，我今次終於睇清佢啦。」講緊嘅呢位「名人」，原來就係現年39歲嘅亞視前高層盛品儒。盛品儒前年背住當時仲係拍拖女友嘅銳思集團主席蔡一鳳，啜爆C奶o靚模郭奕芯（Ashina），盛品儒當日知衰立即認錯，火速斬纜，並追番蔡一鳳，馬上求埋婚，前年底先註冊，舊年才補擺喜酒宴客，結婚未夠兩年，又爆出有小三……有冇咁肚餓呢？盛品儒最初否認係當事人，最後竟然係老婆幫佢認咗。咁離奇？咁有冇搞出人命？盛品儒堅稱：冇。時光倒流返番噚晚，香討個po出咗之後，《蘋果》即致電盛品儒求證，當時佢以短訊回覆：「又俾人黑？當然否認，沒有此事，我沒有。」蔡一鳳知道老公又爆大鑊嘢，強忍怒火，噚晚代老公回應：「了解咗，James（盛品儒）解釋同個女仔喺我哋結婚前識嘅，佢哋係有聯絡，記得舊年2月，有晚半夜我哋瞓緊，老公電話收到短訊，喺嗰個女仔傳嚟，我叫佢快啲同人講清楚，唔好畀人幻想同希望。James話會啦，我就冇再哦佢。」蔡一鳳話，經過佢一再「審問」，盛品儒終於「和盤托出」。蔡一鳳話：「James承認幾個月前，咁啱我出咗trip，佢同嗰女仔又出咗去飲嘢。我有話James，佢結婚前點玩都得，但結婚之後就要對家庭負責任，佢都話知錯，佢堅決話冇同個女仔有親密關係，我仲要佢立即同人哋講清楚，唔想再有更多誤會。」到今日喇，記者再打畀盛品儒。有老婆幫佢「開咗路」，盛品儒亦直認：「我結婚前同佢透過fb網聊識嘅，咁老婆成日出差，陪唔到我，有時又嗌交，我咪識咗呢個女仔激吓佢，我哋係出去飲過幾次嘢，佢成日想見我，我話下次先，我承認係拖住對方，我處理得唔好，我都要同佢講『對唔住』。」盛品儒呢個「疑似情人」，現職文員，用Tasha S. Lopez嘅名嚟開facebook，但佢account噚日就突然鏟走咗，佢喺fb貼過好多爆乳同跳跳鋼管舞嘅相。咁點解「出去飲過幾次嘢」都搞到要爆佢大鑊？盛品儒解釋係因為女方發脾氣喎，仲強調佢哋絕無親密關係，亦冇影過情慾相。哦，咁即係俾人屈啦？會唔會循法律途徑追究以保聲譽？盛品儒卻稱：「我諗唔好搞大件事，我都有錯，我話斬纜又冇同佢講清楚，呢次講清楚，嚴正啲，我同佢講再見我就死啦。」記者仲致電Tasha求證，不過佢手機轉駁去留言信箱。但件事係未完。詳見另文。
| (網上圖片) |  疑似小三不時喺fb晒性感相 (網上圖片) |  (網上圖片) |
 Tasha仲有腿張開跳舞相 (網上圖片) |  仲有鋼管舞 (網上圖片) |  (網上圖片) |
 盛生今次真係頭痕 |
|
鍾意就快D Share啦！
|
|
|