有「金句王」之稱嘅天王黎明 （Leon），最近活躍Facebook，唔少關注佢嘅網民都為之雀躍，期待Leon爆金句，Leon亦不負眾望，早前一條横店揸車Rap住講「鍾意就鍾意，唔鍾意就唔鍾意，唔好講咩L.I.K.E」嘅片hit爆網絡，而過往從未公開為佢嘅「金句」解話嘅Leon，終於出現喺《蘋果》「人人問黎明」環節喇！想知「核心嘅外圍係核心嘅內圍」點解？究竟Leon係點樣可以做到「唔會空肚食早餐」？唔使估喇，即刻睇吓Leon點拆解記者：譚倩宜 攝影：林德雄、陳志嵐、郭賢興問：其實空肚食早餐係點解架呢？
答：哎吔，其實有人誤會我，有人問過我，喂Leon，你唔會空肚食早餐咁嘅說話都講得出嚟呀！我答佢梗係唔係因為我每朝起身都會飲一杯熱水先開始食早餐，咁就唔算空肚啦，估唔到兩三個人嘅對話會演變到唔會空肚食早餐。問：黎明，你可唔可以講下你每日三餐食啲乜架？
答：呵呵！太好喇！我早餐食煮蛋，午飯先食菜，然後食麵，嗰日唔使太大量工作就可能只食魚就夠，晚飯有時牛扒同菜，有時唔使做嘢會食東坡肉加飯，但會好肥。問：Leon，你其實俾人話係金句王，你會唔會唔開心架？
答：如果唔開心有得選擇，咁算喇，唔開心根本冇得選擇，我開心畀你睇喇，其實我唔明白點解會有金句兩個字，點解唔叫銀句呢？問：Leon，我想問核心外圍係核心內圍係點解0架？
答：核心嘅內圍同核心嘅外圍，核心，我可以睇到佢嘅外圍，但外圍裏面一定有內圍，咁如果內圍裏面仲有小核心，你喺外邊鑽個窿入去睇嗰時，你依然會見到外圍，取決於嗰個核內有幾多個「核核」，而洐生幾多個外圍同內圍，清楚晒問：Leon，你鍾意貓多啲定狗多啲呀？
答：我鍾意貓又鍾意狗，貓我鍾意公，因為公嬌嗲啲，狗我鍾意乸，但我依家嘗試改變自己狗都鍾意公，但貓就唔鍾意乸，因為貓乸容易發脾氣。問：黎明我想問你有冇八達通架，平時用嚟「嘟」乜嘢多架？
答：八達通有好多種，我大又有細又有，連特別版都有，平時用嚟去戲院買熱狗、買爆谷同停車場，係呢三樣。問：Leon你鍾唔鍾意食牛雜0架？
答：我好鍾意食牛雜，牛雜裏面最鍾意食蒡、腸，肚我唔鍾意食，肺都麻麻。問：打邊爐你最鍾意乜嘢湯底？有乜嘢必食？
答：我麻辣湯底又得，海底椰同清湯都得。牛肉、羊肉、花枝丸、火腿丸、貢丸同好食嘅墨魚丸，因為難食嘅墨魚丸太黐牙，太有彈性。問：Leon，你facebook啲好有創意，會唔會玩埋instagram？
答：facebook溫柔一啲，instagram好似比較激，炫耀多啲，或者都試一試。問：Leon我覺得你幾有喜劇細胞，會唔會拍多啲笑片？
答：喜劇細胞係冇得刻意，因為我唔係刻意咗但識得隱藏嘅人，所以喜劇嚟講，我覺得唔好再挑戰自己唔得嘅地方，除非真係緣份到，如果有一日我真係拍喜劇，老闆唔怕蝕，我會同你博一博，why not？任何嘢都要試吓，老闆就可能唔願意。問：我已經退咗休，你覺得我仲有冇魅力？
答：大家都一樣吖，大家都戴帽，當然有魅力同埋魅力係來自自己信心，你有信心又不傷害人，你就有魅力。問：Leon，如果你想講好鍾意，但又唔以講L.I.K.E，咁仲可以講乜呀？
答：好似呢個女仔講L.I.K.E我就覺得好真誠，佢打破咗我對L.I.K.E嘅睇法，好似「喂，你like不like」呢嗰字有恐嚇性同有威迫感覺。頭先嗰個女仔話L.I.K.E，再講like唔like，呢件事上就溫柔好多喇。L.I.K.E可以咁樣表達，但唔好講我like隻歌，我覺得怪怪地，係嘛？鍾意就鍾意，Do you like it？問：Leon你覺得你邊句金句最金？
答：我冇金句將人跣到攤攤腰，所以冇「甘」唔「甘」。
|
鍾意就快D Share啦！
|
|
|
