探熱針
再為賣花阿婆打氣 Sammi送粥送湯
佐敦吳松街有間小花店，店主黃婆婆靠一雙手，自食其力。情人節前夕，熱心網民 Joe Li在 fb貼文，呼籲市民幫襯婆婆買花； Sammi即晚在 fb轉發，天后的號召力，成功令婆婆過了一個豐收的情人節……
事後黃婆婆接受訪問：「鄭秀文，你幾時嚟探我？我留紮最靚嘅花俾你，但你預早話俾我聽至訂到㗎！」
原來唔係得個講字！早前 Sammi靜雞雞帶埋愛心粥和湯水去探婆婆，第一日雖然摸門釘，但她冇就此放棄，第二日再去多次，終於同婆婆碰到面，即使只是共處短短幾分鐘，已令黃婆婆相當難忘：「佢好有心！」
網絡力量不容忽視
早年受過丈夫虐打的黃婆婆，離婚後接手了女兒的花店，靠賣花養活自己；多年來風雨不改，穿梭花墟、佐敦，買貨賣貨一腳踢。原本一間唔起眼的小花店，今個情人節卻做了幾萬蚊生意。全靠網民力量！
「千多謝萬多謝！多謝多謝多謝！好多人嚟幫襯，好歡喜，未試過，真係好似發夢，真係估唔到咁好！嚟支持我！」黃婆婆多謝發起幫襯婆婆買花的網友 Joe Li外，更加多謝幫手轉發的 Sammi鄭秀文！
兜圈兩個鐘摸門釘
之後網民發起「#多謝 sammi」 hash tag，希望 Sammi現身，圓婆婆心願。
事實上， Sammi早前確曾親自到過佐敦，探望婆婆。當晚大約八點， Sammi的保母車在吳松街附近不停兜圈，而每次經過婆婆的花店，坐在車上的 Sammi都探頭張望，可惜，當晚黃婆婆遲遲未有開門。
一心想見婆婆的 Sammi未有立即放棄，繼續坐住七人車在附近繞圈，足足等了兩個小時，見婆婆仍未有開門做生意， Sammi先肯離開。
雖然摸門釘，但第二日， Sammi又再到訪花店，今次二人終於見到面， Sammi還專程帶埋愛心粥和湯水送給婆婆，雖然只是短短一陣子，已令婆婆笑到合唔埋口。
「（頭先邊個嚟咗？）咪鄭秀文囉！（佢帶咗咩俾你？）粥同埋湯，飲咗兩啖，啲奶白色嘅，好好飲；啲湯我收埋咗，驚人偷！粥就已經食咗兩碗！（有冇送花俾 Sammi？）嚟到一枝花都冇，好彩佢好有心，支持我，好支持！」黃婆婆說。
撰文、攝影、攝錄：娛樂組
|
鍾意就快D Share啦！
|
|
|
