黑仔王溫朗鈞為人樂觀，他不認為職場上不如意，「我只係明白到，原來呢個世界上，咩事都有可能發生。」
壹些事壹些情
中共魔爪 玩殘傳媒黑仔王
「永恒」的亞視終在四月二日「熄燈」，曾在亞視新聞部實習三個月的溫朗鈞，離開亞視後一直黑氣纏身，畢業後到《陽光時務週刊》及「主場新聞」網站打工，兩個媒體都相繼執笠。
他轉戰政界，擔任民主黨立法會議員兼屯門區議員何俊仁的助理，怎料黑仔影響因子再度發功，去年區議會選舉，何俊仁連擔任了十六年的議席都輸掉，溫朗鈞堪稱職場地獄黑仔王。
時也命也，查實他比任何人都「有幸」，親身見證到中共有形或無形的魔爪。
「吓，你真係想做訪問呀？」記者以為溫朗鈞猶豫現在或未來的僱主對他避之則吉，原來他只是不知道本身經歷可以成為新聞。
能夠成為新聞，只因跟政治有關。二十七歲的溫朗鈞就讀珠海書院新聞系，二○一一年在亞視新聞部實習三個月，跟很多「亞視人」一樣，他覺得在亞視工作最大的「得着」是同事之間不計較，「亞視一定唔夠其他大台資源多，但我哋喺同一個空間做同一單新聞，我唔覺得亞視嘅新聞會比無綫差。」
雖然亞視病入膏肓，但溫朗鈞當時未有機會送亞視最後一程，因為這些機會他留了給其他傳媒機構。畢業後他在《陽光時務》做實習生，後來轉做「香港組」的編輯，「嗰時一二年，梁振英啱啱上場，唔知點解會有一啲好新奇嘅團體走出嚟，包括愛港力。試過放蛇去參加他們的聚會、飲宴，了解一下有乜嘢人。」
令《陽光時務》一炮而紅，是一三年初劉夢熊大爆 689黑材料的訪問，那一期週刊賣斷市，「我同朋友介紹我嘅工作時，佢哋好多時未必知道陽光時務係乜。劉夢熊嗰期書出咗之後，大家就會記得，啊，劉夢熊嗰本。」怎料爆完 689大鑊後，週刊因營運問題，一三年中開始不再賣書，溫朗鈞的第一份全職工作就這樣結束。
蔡東豪被迫執笠
其時新網媒崛起，溫朗鈞覺得新聞網站「主場新聞」也是傳媒的一條出路。可惜入職一年，他的黑氣又發功，一四年七月老闆蔡東豪突然結束「主場」，「嗰日係星期六，我放緊假。有人 WhatsApp我，問我咩事，我上網睇一睇，先見到個結業聲明， Tony（蔡東豪）寫嗰篇，我都呆一呆……字裡行間都見到佢係迫不得已咁做，我哋同事係諒解佢。」
平時一間公司結業，他認為多是財政原因。這一次，他深明原來政治可影響一間傳媒的營運，「主場有好多讀者，當中有好多係支持佔領。喺未有發生任何事之前， Tony係支持佔中。喺有啲人眼中，咁樣係好大問題。」
佔領結束，蔡東豪另設「立場新聞」，讀者人數減少，但溫朗鈞仍然撐舊東主，「應該做就要去做，相信堅持真相，要報就報，要堅持捍衞民主、自由、法治呢啲核心價值。」
轉投政界輸選戰
不過他沒有過檔「立場」，因為「主場」執笠，他轉做民主黨何俊仁的助理，兼打一五年的區議會選戰，結果何俊仁連當了十六年的屯門區議會議席都輸掉。「投票嗰日，對手改變咗一啲策略，佢哋冇指名道姓，但話唔需要一啲人喺議會入面睇 AV。呢啲當然係失實指控，但佢哋冇指名道姓，你冇辦法反駁。我見到佢哋採取咗一啲以往冇用過嘅策略，我諗呢件事都會影響選民嘅觀感。」
打低何俊仁的，是西環力捧的何君堯，兩人票數相差二百七十七票；熱血公民鄭松泰則有三百九十一票。對於這個賽果，究竟西環有沒有出手，溫朗鈞答得很小心，「有呢個因素影響，但我唔可以確定。一場民主選舉，都唔可以忽略有選民係希望有何俊仁以外嘅選擇，要尊重佢哋嘅意願。」
隨着老闆落選，黑仔王再次失業。不過他年初搵到新工，做回老本行，在「端傳媒」擔任網站編輯。究竟上司張潔平怕不怕？「佢嘅反應好直接，佢話點解我做嘅每一間機構，都有一個好似唔太好嘅結果。」
既然擁有黑仔的影響因子，會否考慮犧牲自己，加入共產黨？「講笑就話我要加入共產黨，加入建制派，但首先係我想唔想囉。」
撰文：袁慧妍
攝影：關永浩
攝錄：陳浩樂
news@nextdigital.com.hk
|
鍾意就快D Share啦！
|
|
|