太陽娛樂老闆周焯華（洗米華）同女友Mandy Lieu「世紀一拖」後，爭米戰局面終於出現裂口，正印陳慧玲心淡搞離婚，勝利者姿態嘅Mandy再會為洗米華生第二胎，有傳佢下月喺倫敦生B仔，連埋1歲大女周願，湊夠一個「好」字。
噚日就有報道話爭米戰再有變數，有指洗米華呢排有新對象，就係諸葛紫岐開嘅星韜娛樂旗下藝人莊端兒（Xenia）。話說洗米華同Xenia早已認識，但上月喺澳門舉行嘅「亞洲電影大獎」活動重遇，洗米華見到以35E八字波超性感嘅Xenia，即場主動笑笑口合照，之後再交換電話兼狂WhatsApp女方。而Xenia又剛回復單身，月中傳佢嫌棄男友張致恒懶散而分手，緋聞同分手時間真係校都冇咁準。
Mandy陀B照操
此外，有指Mandy雖然下月就生B，但依然未鬆懈keep fit，話佢以日薪5千蚊搵健身教練日操4粒鐘，又學琴同畫畫增值自己。另一邊又指洗米華拖字訣，拒絕同老婆簽字完成離婚手續，Mandy經理人就回覆本報，對佢私人事不作回應。而端兒就冇聽電話，其經理人回覆：「端兒不在港，對此事唔太清楚，要了解吓件事先。」
撰文：馮仁昭
|
鍾意就快D Share啦！
|
|
|
