舒淇哈哈笑贈慶樂基兒派定心丸
原定昨晚開騷的黎明，埋門一腳因場地唔符合安全規定，不獲發牌焗住取消令全城嘩然。黎明兩位舊愛－前女友舒淇與前妻樂基兒，昨晚分別出席活動，對事件態度各異。舒淇聞訊竟哈哈笑謂：「好彩我哋呢度冇取消。」似有贈慶之嫌。相反樂基兒雖不知情，但揚言黎明唔會放棄，定會諗辦法處理，大派定心丸。
天王黎明合共八場於中環海濱舉辦的《「黎明Leon 30th Anniversary Random Love Songs 4D in live 2016」演唱會》，原定昨晚八時開鑼。豈料開騷前兩小時，突然因未符合消防安全規定，不獲食環署發臨時娛樂牌被迫取消，令粉絲不知所措。
剛巧兩位前度舒淇與樂基兒昨晚分別出席活動，隨即被追問此事。穿上Tube Top的舒淇出席鞋履活動，提到黎明昨晚演唱會宣布取消？她起初有點愕然，「吓」了一聲，其後笑笑口謂：「好彩我哋呢度冇取消，哈哈。」她反問記者為何取消，得知是因牌照問題時表示：「吓，咁都得？（戥粉絲失望？）作為粉絲一定會，同埋唔可以咁臨時。（現場粉絲喊晒喎。）呢個係幾令人失望嘅消息。（慰問Leon？）如果有機會。」問她為何不看Leon演唱會？她表示剛從台灣拍戲返港，不清楚香港發生甚麼事。
必有planning唔會走數
至於黎明前妻樂基兒昨晚出席護膚品牌活動，表示今日不在港去度假，所以不會去看黎明個唱，但有不少朋友會去捧場。提到演唱會未獲發臨時娛樂牌被取消，她謂：「唔知道，佢下次都會搞，我好難答。（好可惜？）佢會plan，唔會就咁取消唔理，會諗點做。（幫朋友買飛？）佢哋自己買。」再被追問黎明有否邀請她看演唱會，樂基兒不願再多答，簡單謂：「唔答。」繼而離開。
鄧詠雪停化妝齋等安排
此外，有份任演唱會舞蹈員的前組合HunterZ成員鄧詠雪（Suetzi），接受電話訪問時，被問到何時知道個唱取消一事，她說：「都係6點9左右通知我哋，叫我哋暫時唔使化妝，叫我哋喺房等住先。（見到黎明？）冇，不過都知佢喺會場，可能忙緊。」問到她可有信心個唱能繼續舉辦，她說：「我對黎明有信心！應該冇問題！（如果萬一舉辦唔成，咁人工點計？）呢個都未知，因為大會都未同我哋傾，只係叫我哋等。」
而任演唱會音樂顧問的雷頌德，則透過社交網以英語撰文為黎明打氣：「我知道你能夠成事的。做一個先鋒和行第一個的人是困難的，但你的團隊和粉絲會在你身邊。」
文：名人組
|
鍾意就快D Share啦！
|
|
|
