樂隊Mr.主音布志綸（Alan），前年十一月與拍拖4年、家族坐擁十億身家嘅富家女女友Sally結婚，被指升呢十億駙馬。而呢位十億駙馬最近亦榮升咗做人父，佢啱啱喺社交網大晒囝囝握住手指的萌照，仲留言：「你出來的一刻我忍不住流淚了，媽媽為你付出的愛真的是無限的偉大，爸爸感受到了！要健健康康，做一個愛錫媽媽的好孩子啊！感恩。#真的新開始」
太太19日誕7磅半B
Alan接受《東網》電話訪問時，表示囝囝是在前日（19/4）出世，重7磅半，Alan說：「太太嗰日經過18個鐘先生，喺等嘅時候我比較緊張，因為見到太太好辛苦，其實生嘅時候唔係咁順利，因為BB個頭未落晒，最初仲諗過要開刀，不過最終都順產生咗，嗰刻真係Feel到母愛真係好偉大，好震撼，我都忍唔住爆喊，又唔知顧太太先，還是顧BB，有啲無棱兩可。」Alan親手為囝囝剪臍帶，他以剪豬大腸來形容，他笑說：「我平日好鍾意食豬大腸，所以剪嗰吓感覺好怪。」他表示囝囝出世後是他人生另一頁新開始。
囝囝叫布寸、布警？
Alan表示中文名等他爸爸媽媽去改，他笑說：「我唔係好識改，因為我個姓布好難改，啲朋友畀埋晒Idea話叫布寸、布警，當然唔會用。」囝囝英文名同他一樣A字頭，Adam就是太太改的。」他指囝囝個鼻似太太夠高，不過對眼就似足Alan，他笑說：「佢未出世之前我已經驚佢對眼似我，因為我對眼又腫又矇，希望將來仔仔靚仔過我呢個老竇。」
「真係好佩服太太」
Alan表示太太會餵人奶，因為太太愛自然，他說：「佢佗得好辛苦，仲Keep住返工，朝朝五點幾就起身，我真係好佩服我太太，作為現代女性我覺得佢係其中一個表表者。」問會給太太甚麼鼓勵？他說：「對佢好啲，我哋同唱片公司合約就快約滿，工作唔係好多，可以喺呢段時間多啲陪佢，況且我哋入行8年，都係時間可以休息一吓。」談到他生仔很秘密，Alan表示不是秘密，是太太比較低調，加上近半年樂隊Mr.也少露面，Mr.四個拍檔都知他太太有喜，不過暫時未見過BB。
|
鍾意就快D Share啦！
|
|
|