俗語都話「三個女人一個墟」，咁八個女人呢？唔只兩個墟，仲有一大堆是非㖭！Viu Tv真人騷《G-1格鬥會》搵嚟八個女星打MMA，節目未出街已經話題多多，當中犯眾憎嘅黎美言（Winkie）被對手狂數罪狀，連鄧穎芝（Vangie）都公開講：「我係好憎佢！」勁重火藥味，自然夠晒睇頭而尋晚播出嘅一集，就由Vangie對戰Winkie，而Vangie仲喺節目開始前，已於網上發千字文揞名鬧爆Winkie，難怪一眾網友買定花生等睇世紀之戰，仲話佢哋咁大仇口實打到勁激之餘，仲可能唔留手，分分鐘搞出人命喎！
其他參選者插爆黎美言
Vangie同Winkie未開打之前，其他參選者係咁力數Winkie不是，好似唐紫睿（Hazel）、劉燕妮（Rika）同鄧洢玲控訴對方喺練習嗰陣太用力打，仲要專攻佢哋嘅重要部位，指控Winkie想未出賽前就整傷對手。而Winkie似乎太投入，同教練學習招式嗰陣都出全力，搞到教練都嗌晒救命，又差少少畀佢整親。唔單止對手插爆Winkie，有網友都睇唔過眼，指佢應該見好就收，唔好拳拳都攻對手嘅重要部位咁無品，仲話呢個只係節目，批評Winkie咁打法會搞出人命！
網友撐黎美言似拳手
當然有網友撐Winkie，指佢認真對待呢個節目，所以練習都出晒100%力，仲讚佢「上到台似足一個拳手」。而以一敵七嘅Winkie面對呢啲指控，就話自己太有性格先招惹是非，仲寸爆話：「其實我唔需要喺度識朋友。」Vangie都唔留情指同對方從來都唔係friend，繼續火藥咪濃，真係未開打已經夠晒好睇！
睇到網友血脈沸騰
到正式比賽嗰陣，兩人埋身肉搏，激戰連場，而佔上風嘅Vangie仲唔留力狂打Winkie，相當之狠！皆因Vangie為咗幫Hazel同Rika報仇雪恨而拳拳到肉，而佢贏咗Winkie都high爆話：「呢場我為朋友而打。」唔怪得網友都話呢場世紀之戰好有可觀性，Vangie同Winkie好似真正拳手咁上場打，睇到佢哋血脈沸騰。
無論啲是非點樣睇都好，都為呢個節目增添話題性嘅，睇嚟一眾網友又可以買定花生等睇好戲
網民有話兒：
XXXXXKeo：睇到最後Winkie嘅讀白真心感動，佢無講到其他人任何一句說話，反而係咁講嬲自己唔夠堅強，好似成個節目真係得佢當係MMA咁去打，而唔係做SHOW。
KalXXXXX：好多人話Rika指Winkie打面所以杯佢，但睇返（番）段片Rika係話打到眼同鼻，Winkie應該見好就收，唔係下下都專攻重要部位咁囉！
JXXXXhan：Winkie上到台似足一個拳手，好有火！
PennXXXX：教練示範教授斷頭台，黎美言就差D（啲）扭斷人條頸，以為真係斷頭台呀依家。
陳XX：終於有場認真打，無揸流攤，好睇！
|
鍾意就快D Share啦！
|
|
|