歌手鄭融尋晚喺關淑怡（Shirley）演唱會中，幸運地被dancer選咗上台合跳咗一part舞！個男dancer嘅舞姿非常火辣，不時抱起鄭融，期間對方隻手仲疑似掂到鄭融胸部，之後佢又將鄭融放喺櫈上，仲把雙腳搭喺鄭融大髀上，臨尾再將鄭融推低，以男上女下嘅姿勢瞓喺地上，意識咁大膽，搞到一直Keep住笑嘅鄭融，都流露出一副尷尬樣！
男dancer冇掂到個胸
鄭融今日接受《東網》訪問，佢堅稱冇咩大問題：「唔覺得有啲咩，當然最後預先有排過啦，就係冇。（佢掂到你個胸？）冇，唔係咁，我有跳芭蕾舞，當要被人抱起，要靠肋骨支撐抱起，好多時都有呢個動作。大家唔好咁緊張，我冇諗，大家都唔使諗咁多，喺紅館舞台上做得到啲咩呀。」
想離開張櫈
講到佢好似一臉尷尬樣，佢就笑話：「梗有啲尷尬，佢捉我上台，我係呆咗一下，好想離開張櫈避開佢，變成搞笑版本，不過要睇吓邊個主場，如果嗰個歌手好玩得，平日我就會行埋一邊跑，等個dancer跑嚟捉，將氣氛變得搞笑，但因為個主場係Shirley，佢係好有舞台嘅Artist，所以我尊重佢風格，跳吓舞。」
讚dancer專業識借位
對於與男dancer嘅一場舞夠晒火辣，鄭融表示：「其實個dancer好叻，佢營造視覺效果，大家見到我哋好貼身，好似錫埋嚟，其實我哋中間有距離，佢係專業識得借位、角度，驟眼睇好似好埋身咁。（你都好叻即場發揮配合？）我都跳咗咁多年舞，只係唔知佢係咁抱起我，好似抱咗我3次，我都不停笑話：『again（再次）、why（點解）！』。」
好鍾意關淑怡
不過鄭融強調佢係好開心，因為佢好鍾意Shirley個演唱會，佢再話：「呢個先係重點，我好鍾意佢個騷，我有時都會同佢飲咖啡傾吓偈，佢好錫我哋呢啲後輩，個人又冇架子，佢喺工作上面係一個好有要求嘅Artist，好多時佢都會同我分享吓一啲佢嘅意見。」
|
鍾意就快D Share啦！
|
|
|