李蘊誕7磅B女唔夠契媽G.E.M.作歌快
現年24歲的李蘊（Renee）前日順利誕下重約7磅B女，榮升人母！講到產女經過，她透露陣痛12小時成功「屙出B」，皆因感覺似好急想去大便，奈何護士不准「屙」，十分辛苦，而一直陪伴在旁的老公感動到喊！其好姊妹鄧紫棋（G.E.M.）及何超蓮升呢契媽，G.E.M.花了半小時創作國語歌祝賀，歌詞更包含兩位好姊妹的「名字」，相當有心思！
恭喜恭喜！歌手李蘊（Renee）今年一月跟內地金融才俊羅章冠補擺喜酒，隨即宣布懷有猴B，之前還稱醫生指B女要六月才出世，豈料前日已誕下B女升呢媽媽！昨日凌晨三時許她在網上上載B女的腳仔相，留言稱愛女已於16日出生，重約7磅：「我們的寶貝女兒在昨天提早了三星期來報到了，痛了12小時，順產3.2kg，很感恩，從此16/5是我人生最難忘的一天。」昨晨她又上載母女合照，B女已經識笑。因老公怕出鏡，影一家三口的照片時，李蘊用公仔圖案為老公遮面。
老公陪產開心到喊
Renee誕女，兩位好姊妹鄧紫棋（G.E.M.）及何超蓮榮升契媽，G.E.M.準備大禮慶祝，送上親自創作的國語歌。昨日凌晨她在網上發布自彈自唱的新歌，並留言：「何小姐深夜對我施加壓力叫我寫歌給她...後來我就...好吧...我聽話...立即去寫！親愛的各位，0516，我和超蓮正式成為乾媽了！好感動！」此曲不但是送給契女，亦是送給超蓮的25歲生日禮物，歌詞除表達她們三人深厚的友情外，G.E.M.更在歌詞加入兩位好姊妹名字的普通話諧音，認真有心思！超蓮亦有轉發該曲，指是紀念「我們仨的緣分」，在微博回覆網友時，她更大爆G.E.M.作此曲只用了半小時，大讚對方「急才王」！
G.E.M.接受電話訪問時坦言十分開心：「我同超蓮係講唔到其他嘢，淨係不停講Oh My God。」講到寫歌過程，她稱是靈感湧現：「尋晚超蓮問我幾時可以寫首有佢哋兩個個名嘅歌，我隔咗十分鐘一睇到就好快寫咗兩句歌詞，寫咗就不如寫埋個曲，我坐埋去個鋼琴就開始寫，都係幾分鐘嘅事，之後錄完就好快Send畀佢哋兩個，跟住就甫咗上網。」
身為媽媽的Renee當然最開心！產後的她接受電話訪問大談順產經過，自爆食完西瓜開始見紅，但強調女兒足月：「佢出世係37周4（日），我喺37周2（日）嗰日喺屋企食咗個西瓜，去廁所發現有血，跟住執走佬袋去醫院，醫生安排我入院，但入咗院之後得血，冇話規律陣痛、冇穿水，所以喺醫院住咗兩晚。」但她表示第二晚凌晨突然陣痛，覺得快要生，故入產房，期間要聞「笑氣」（一氧化二氮）及打止痛針止痛：「開到5、6度開始語無倫次，愈嚟愈痛，從來未試過咁痛，終於畀我經歷到原來真係形容唔到嘅痛！到開到8、9度，感覺係好急好想去大便嘅感覺，姑娘不停叫唔准屙，真係好辛苦！」
試餵母乳未上奶
她表示開到10度時終於可以屙，老公一直陪伴她：「佢見到BB個頭已經眼濕濕，見到BB個身出埋嚟佢就喊，我因為聞咗啲氣好High又眼瞓，所以冇喊，依家諗番係好感動！」她表示BB有時似老公有時似她，笑言最好兩個都似。她又稱昨晨有試餵人奶，但未上奶：「兩三日之後先有，依家盡量試感覺同個位，覺得同佢好親密，盡量一上奶就全人奶。」她又稱未為BB改中、英及乳名。昨晚G.E.M.和超蓮到醫院探Renee及契女，G.E.M.在網上貼出四人合照，大讚B女可愛。而甄詠珊亦有探望，指看到對方由小妹妹變成好媽媽，十分感動。
文：音樂組
|
鍾意就快D Share啦！
|
|
|