天王黎明（Leon）第5場4D騷來到尾聲，Leon就喺台上分享喺摩天輪度同粉絲零距離接觸嘅時刻，佢透露喺摩天輪上，有粉絲問佢幾時結婚，因為粉絲個媽咪經常問住佢幾時結婚，咁Leon就搞笑咁話：「雖然我係畏高，想分我心，但係呢樣嘢係轉移唔到我嘅！」
「金句王」Leon一講開金句，當然唔會畀佢停啦，之後佢仲大談感情觀：「有啲女仔可以組織家庭，有啲女仔就咬晒牙籤，好似獨行俠咁，所以遇到結婚就結婚囉，遇唔到就等待結婚。呢個係每個人嘅性格，唔可以怪人嘅！所以結唔結婚嘅問題，唔好將你嘅責任放喺我度，我嘅責任亦唔會放喺你度。放心一步一步嚟，呢個社會就好完善嘅，有老人院，最緊要大家健健康康！其實呢個世界唔係咁恐怖，當你有家庭嘅時侯，應該珍惜老婆，唔好一結咗婚就老虎上身咁，呢個都係視乎性格。」
「洗衣機」摩天輪
跟住畏高嘅Leon就繼續講摩天輪：「呢個摩天輪都抵讚，當年15歲我喺英國讀書，咁啱嗰時搞緊嘉年華，見人哋玩得好開心，咁啱星期六咪玩埋一份，個摩天輪就圓形嘅，有個窿咁樣，坐都要扣晒安全帶嘅，上去好似玩緊洗衣機咁，降落嗰刻心情就係『死就死』，頭先嘅就好快，傾吓傾吓就落咗嚟喇。」
台下有歌迷問Leon拍拖會否坐摩天輪？Leon就笑笑口咁話：「就算有我都唔會嚟（呢度）玩啦，唔會畀你見到㗎喇。OK！今晚多謝你哋嚟，知有啲朋友係請假嚟睇，我後生嗰時一定會有衝動嘅，可能嗌完交之後會將個頭撞向牆度，或者自己匿埋一角。」
教你點應付阿媽
Leon續說：「以前喺北京有個婆婆，每次返去都會講同一番說話，問我幾時結婚、幾時生個孫畀佢玩，每一次都講番同一句嘢嘅，果時自己應該係25到26歲度，最多30歲度我就話婆婆冷靜啲，呢個係我人生，我做嘅嘢係正常事，唔能夠為一個人改變自己，所以當然你等到梗係等否則我都會陪你傾偈嘅。婆婆聽完都好開心，後來婆婆80幾歲都好好中氣，後巷見到我都會嗌我，冇音樂我哋都跳舞嘅，所以有機會畀阿媽『哦』嗰時，可以先DUP停（緊急煞停）咗佢先！」
|
鍾意就快D Share啦！
|
|
|