「〡〤〨」你看得懂嗎？這些字體曾經充斥香港街頭巷尾，只要是商戶標示價錢，必然使用，它叫花碼，是其中一種數目字。不過，隨着時代變化，花碼數字已成「文化遺產」。東網記者在港九新界各區搜尋，上環海味街、嘉咸街街市及灣仔街市等舊商戶都已棄用，改為阿拉伯數字，僅在少數食肆仍有花碼影蹤，東主希望藉此教育學生識多一種字體，不過並非個個看得懂，「啲內地人全部唔識睇，以為我啲糖水全部1蚊碗。」
「148囉！以前我哋都係用依啲字，係中國傳統數字，當年唔使人教，自然會識，但好耐都冇人用」記者手持「〡〤〨」花碼數字訪問途人，除了年逾90歲的鄺伯伯一眼認到這些數字外，年輕一輩大都一面茫然。「以前街市都有見過。」年輕的歐陽小姐成功認出1及4字，對花碼數字已感到陌生，但認為花碼是傳統文化，值得保存。
花碼數字源自內地蘇州，以往廣泛應用於香港小販攤檔，小巴價錢牌亦曾使用花碼。要看懂花碼並不困難，價錢牌一般分為兩行，第1行記載數字，第2行記數值單位，如第2行單位是百元，即第1行第1位數字為百位。例如〡〤〨下方為百元，即是148元，而〡〤〨下方為十元，即是14.8元。
上環傳統酒樓蓮香居及蓮香樓仍局部使用花碼，蓮香集團公關部林先生指：「以前酒樓餐牌都係用毛筆寫，阿拉伯數字太多彎位，毛筆寫出嚟唔靚，花碼先寫到嗰種書法美感，所以酒樓一定用花碼。」不過，他指近年看不懂花碼的顧客愈來愈多，因此餐牌已順應民意轉為阿拉伯數字，只有牆上的時令推介餐單才會用花碼。他表示：「始終係傳統文化，可以保留，我哋都會盡量保留。」
上環的瑞記及油麻地源記喳咋亦在牆上餐牌使用花碼數字，源記喳咋老闆陳先生解釋：「我爸爸以前都係用花碼字，而我都唔想去改。」他直言愈來愈少年輕一代認識花碼數子，盼望店舖的花碼餐牌可以教懂學生認識中國傳統數字。他又笑言：「特別啲內地人全部唔識睇，以為我啲糖水全部1蚊碗，龜苓膏都係10蚊碗？唔好玩」
香港歷史學者梁炳華指出，花碼用作配合算盤使用，但隨着時代演變，算盤已被計算機淘汰，花碼亦日趨罕見。他回憶：「以前我哋讀書時，學校都有教算盤，花碼用嚟標示運算結果，所以我哋個年代的人對花碼係好熟悉，但現今都係方便為主，只會用阿拉伯數字，冇咩人認識花碼。」
|
鍾意就快D Share啦！
|
|
|