近年樂壇市道麻麻，除咗班一線歌手，好多歌手都唔可以只靠唱歌出碟搵食，好多歌手迫於無奈學定其他技能，希望除咗唱歌之外，都有番一技傍身增值自己，搵到生存之道！前組合HotCha，張惠雅（Regen）、張紋嘉（Crystal）同黎美言（Winkie）深明此道理，分別學中醫針灸、占卜星相及打拳技能來傍身！
前組合HotCha喺2007年出道，去到2014年正式解散，之後佢哋各自發展，好似Regen就嘗試拍劇，Crystal就挑戰舞台劇。雖然佢哋都仲好鍾意唱歌跳舞，但依家市道唔好，佢哋都決定學多一門手藝增值自己兼搵食！
勸諗清楚先好入行
Regen依家就讀香港大學校外Part-time中醫課程，佢已經讀咗半年，佢又話個課程要幾萬蚊一年，每星期要上兩日學，但因為學費好貴，所以幾忙都會抽時間返學。Regen話人生目標係希望可以幫到人，細個嗰時有諗過開慈善機構幫人，所以都希望能可以靠中醫幫到人。Regen又話樂壇市道喺佢去澳洲讀書前一年開始變差：「當時我哋一出道接job好密，而且出道頭兩年，公司有畀好多錢安排training畀我哋，但依家啲新人就要樣樣靠自己，依家做歌手又要好似做埋sales咁，自己拍埋片做宣傳，有朋友想入行，我都勸佢哋諗清楚，除非屋企有家底，因為好多時都會係零收入。」
畀多三年自己
Regen覺得做歌手好吃力，有諗過轉行搵過份正常工作，但又怕將來會有遺憾，依家27歲嘅Regen，希望畀多自己三年時間：「希望30歲前可以得到大家認同，不過離開呢個圈都係必然，30歲之後再諗結婚、轉行或流浪，始終做人要踏實啲，屋企又唔係富貴，唔想再喺個圈度浮浮沉沉。」佢又話自己依家人工同普通嘅打工仔人工差唔多，所以佢都想做兼職幫補收入：「我有為自己拍MV，所以想試吓學做導演，唔介意由低做起。」
至於好姊妹Crystal就對占卜星相有興趣，希望兼職做神婆。Winkie就因為參加節目《G-1格鬥會》而學打拳，佢由咩都唔識，變到依家可以拳拳到肉，落咗唔少苦功，而佢亦成功「打」響名堂，因節目而成為話題人物，成功增加知名度之餘，相信亦有助佢日後拍電影。
|
鍾意就快D Share啦！
|
|
|
