ViuTV邀做格鬥女 Yumiko挑機MMA「唔怕變豬頭」
ViuTV真人騷《G-1格鬥會》在一片是非聲之下結束，由於觀眾迴響好大，據知電視台將開拍第二季挑戰賽，向兩位媽咪級的鄭希怡（Yumiko）和余曉彤（Hidy）打主意，力邀兩位人母變身格鬥女，Yumiko自言估不到自己幾十歲人，做了阿媽仍然受賞識，已學半年泰拳的她挑機MMA：「唔怕變豬頭！」
主打真人騷的ViuTV開台MMA節目《G-1格鬥會》，8位參賽女藝人在擂台上打出真血，台下更勢成水火爆是非，「嫩版徐若瑄」劉燕妮（Rika）被打到變豬頭宣告退出娛樂圈，黎美言被眾女投訴出手狠毒。節目成功掀起熱話，據知ViuTV乘勝追擊開拍第二季挑戰賽，力邀人母鄭希怡和余曉彤做格鬥女，與龍小菌、郭思琳、鄧穎芝對戰，現年34歲的Yumiko去年榮升做人母，女兒梁浸浸（乳名）已一歲大，最近Yumiko決定復工，Viu即力邀她出賽。
■鄭希怡獲ViuTV力邀打MMA挑戰賽，已學半年泰拳的她對自己身手有信心，唔怕變豬頭。資料圖片
■Yumiko（右）跟風之子杜恆霖學打泰拳，帶埋囡囡梁浸浸去上堂。互聯網圖片
■Yumiko獲一班好友支持陪練拳。互聯網圖片
■積極備戰的Yumiko揚言要操到最弗。互聯網圖片
學泰拳半年Yumiko曾現身第6集現場睇比賽，昨日她在電話說：「多謝佢哋咁賞識我，自己作為觀眾睇呢個節目，覺得幾有趣味同娛樂性。」問是否已積極練拳備戰？Yumiko說：「其實自己同風之子杜恆霖學咗半年泰拳，一直只諗住健身，冇諗過去比賽，收到呢個消息幾興奮，想睇吓自己呢段時間學成點，𠵱家考慮中。」問是否考慮價錢？她說：「呢個反而唔係。」對於Rika被打到變豬頭，她說：「唔怕，如果我真係決定參加，一定操到自己最弗，唔會畀呢件事發生。好打啲就唔會受傷，我唔係話佢唔好打，我未考慮到咁遠，因為嚟緊要拍戲，未知有冇時間，呢個需要好長時間訓練。」擔心多女人多是非？她說：「呢個我又唔驚，咁多年我都冇乜是非。我有見過佢哋，但未去到熟，我覺得光明正大唔怕有是非。」
■Yumiko曾去第一季《G-1格鬥會》現場偷師。電視圖片
此外，Yumiko囡囡梁浸浸萌爆，昨她在社交網貼女兒反轉超市的短片，梁浸浸將餅乾掃落地下，又捧着兩個椰菜跑來跑去兼喪叫，十分搞笑。
採訪：皓騫
【扭落地】
■成功落地的Yumiko女兒梁浸浸，在超市「掃」餅乾。互聯網圖片
【掃餅乾】
|
鍾意就快D Share啦！
|
|
|
