探熱針
由堆田區搬樓王 周柏豪月使 4萬氹女友
登台、自創品牌網上賣、拍戲，全部照「耷」余文樂的周柏豪，近幾年賺唔少，搵錢能力提高，自然要住好啲！最近他便由每月$15000租的將軍澳日出康城，搬到同區的樓王天晉 II期，千二呎連車位，月租盛惠$40000，等女友 Stephanie住得舒服啲！
俾貴租搬大屋
約朋友去九龍城路邊雞開飯，周柏豪同女友 Stephanie孖咇出動。醫完肚一班戙響條街吹多陣，期間柏豪發現店外的大玻璃貼滿曾幫襯的星級食客相，自己都有份，興奮得拍叫女友一齊睇。之後周柏豪與 Stephanie先離開，揸車直返將軍澳的新愛巢天晉 II期。
由原本以每月萬五蚊租的將軍澳日出康城，搬去同區的天晉 II期，新居地方大咗，租亦比舊居貴近三倍。
「日出康城係高密度屋苑，出入都同人撞口撞面，加上都住咗幾年，柏豪同 Stephanie各自都有好多衫同鞋，間屋得七百幾呎唔夠用，所以先搵地方搬。天晉係區內樓王，唔似得日出康城咁近堆田區，環境 high好多，柏豪租嘅係千二呎單位，租要三萬幾，加埋車位，一個月要成四萬蚊。」知情者說。
知都詐唔知
與女友 Stephanie拍拖八年，雖然家人曾經多次催婚，但周柏豪卻無意提早做老襯，難得女友唔介意，甘做背後的女人。
「柏豪同 Stephanie一齊嘅時候都未紅，當時女朋友搵錢仲多過佢，柏豪屋企人早就認定佢係未來新抱，講過好多次叫佢哋結婚，但柏豪就想再專心搏多幾年先。 Stephanie亦真係好忍得，之前明知男友偷食亦當唔知，柏豪會同佢一齊咁耐，有原因！」
建立好男人形象
過去拍拖同女友前後腳的周柏豪，近年對處理感情的態度亦有所改變。
「以前俾記者問有關拍拖嘅嘢，柏豪都會閃嚟閃去，而家就大方好多，至少唔會避！佢知道有個穩定女友，可以幫自己建立好男人形象，柏豪份人好 care人哋點睇，所以而家都唔會好似以前咁，定性咗好多。」知情者說。
撰文、攝影、攝錄：娛樂組
|
鍾意就快D Share啦！
|
|
|
