大台重頭劇《賭城群英會》拍得如火如荼，是非亦不絕，包括大細超厚待佘詩曼、陳百祥、謝賢等住一流酒店，而馬國明、麥明詩等要屈住賓館外，噚日更驚爆快將80歲嘅謝賢喺深圳出車準備開工時遇暴雨，其座駕疑因一輛cut線嘅貨車而煞車，引發骨牌效應，最終釀成四車連環相撞。據報道指，四哥喺意外中一度被拋離座位，但佢仍堅持開工，不欲影響進度，惟死頂之下覺得腰背越嚟越痛，即急返港醫治，經診斷後證實係左邊肋骨骨裂，需馬上停工。《蘋果》今日打俾四哥，佢就話：「當日落雨，我同助手坐車開工，前面貨車cut線撞過嚟，我個司機急避，於是後面三架車又停唔切撞埋嚟，變成四車相撞，大陸啲人揸車真係亂嚟。撞車時我咁啱冇戴安全帶，又瞓着咗，撞時我碌咗落地。以為冇事，去到片場，我就照開工，拍埋兩場戲，但肋骨開始痛，拍完去咗醫院照X光，醫生猛話冇事，因為佢哋只係同我照咗右邊肋骨，冇照到左邊，原來左邊有條肋骨裂咗。𠵱家我返咗香港睇自己醫生，要抖番幾日。」問四哥今次意外除咗傷肋骨，臉有受傷時，四哥即答：「好彩冇囉。」雖然四可臥病在牀，不過訪問時把聲都算精靈。對於爸爸拍劇出意外，霆鋒就答：「無乜回應啦，多謝關心！」同四哥一樣，年紀有番咁上下嘅劉兆銘(Ming Sir)，都有份拍呢套劇，《蘋果》今日打俾Ming Sir，佢個女就話爸爸依家仲喺深圳拍緊劇，以佢所知應該唔係同四哥坐同一架車。至於，有份拍劇嘅麥明詩，亦有指因哮喘發作，要即刻返港睇醫生，麥明詩今日以短訊回覆本報話：「好小事，第二日我都有繼續開工，多謝關心！」而麥明詩男友林作亦話：「佢冇乜嘢，小事，由細到大都有，佢識得處理同埋控制，其車佢冇乜大礙，不過劇組好照顧佢，為咗安全起見，想佢睇一睇醫生啫！」
|
鍾意就快D Share啦！
|
|
|
