大台搞鬼喜劇，除咗滕麗名再次彈起，演佢細佬嘅張彥博(Bob)都好有話題性！呢位眼大面細娃娃臉嘅「小鮮肉」，十足羅志祥同陳曉東嘅混合版。佢喺劇入面飾演孻仔，但其實今年已經35歲。(新聞連結：http://bit.ly/29ykRGx )對於天生娃娃臉，張彥博就向傳媒透露秘訣話：「我食得好清淡，食嘢之前會睇吓自己嘅皮膚狀態，如果覺得嗰排皮膚差，就會餐餐食粥水，清清腸胃，為咗keep皮膚，我都幾忍得口。」除咗食得清淡，張彥博亦有個另類保鮮法，方法係戒食西藥。佢話：「我近呢10年，數數手指，只係睇過3、4次西醫，通常病咗都係吽到好為止，因為食西藥好傷身！」食療要執到正一正，咁運動亦當然唔少得，張彥博就話：「我每日都會跑步，仲會規定自己一個禮拜跑兩日10K，由尖東海皮路去紅館……」根據張彥博嘅理論，跑上紅館嘅目的，係希望有朝一日，自己可以上到紅館開個唱，35歲、出身赤子樂隊嘅佢，對紅館，依然有夢！
來源 source: http://hk.apple.nextmedia.com
|
鍾意就快D Share啦！
|
|
|