點解可以咁弗，仲要愈嚟愈靚！
唔少前港姐都凍齡有術，97年港姐冠軍翁嘉穗下嫁海馬集團老闆鄔友正之後，生咗兩個小朋友。相隔19年佢就再騷泳衣相，身形竟然同當年一樣，一副性感索魔女嘅樣，完全睇唔出係兩子之母。現年42歲嘅佢，透露保養秘訣係多做運動、打乒乓波同吃得清淡，自然可以將青春留住。
翁嘉穗早前就同三個女性友人去咗峇里旅行幾日，入住全球最佳沙灘度假屋Mulia Villa，大約七千港元一晚。連日嚟，佢換咗多套泳衣同陽光玩遊戲，大晒fit爆身形兼長腿，身形同佢97年選港姐嗰時一模一樣，真係不得了！
戒食油鹽保住三圍
當讚佢身材索嘅時候，佢就好謙咁話普通啫，問到佢嘅三圍同選港姐時有冇分別？翁嘉穗就話：「冇度，但應該變化不大，磅數就多咗四、五磅。」佢透露自己嘅保養心得係每星期做四至五日運動，包括健身、瑜伽、游泳同埋陪老公打乒乓波，實行同老公一齊keep fit：「我老公讀書嗰陣，喺喇沙書院攞過乒乓波比賽冠軍。我當然冇佢咁勁，佢就住我玩。」
而飲食方面，佢就盡量吃得清淡，多吃藜麥、無油鹽嘅食物等，佢笑住咁話：「老公好堅持要食無油、鹽，我初初嫁畀佢嗰時都唔慣，之後真係對健康好，都鍾意咗。」問到喺峇里旅遊期間有冇艷遇？佢就話有個侍應得知佢係香港小姐之後，即刻問佢拎簽名留念。
陪老公新加坡巡舖
完成峇里之行後，嘉穗就去咗新加坡，搵老公鄔友正同埋細仔會合，仲順便睇由公司贊助嘅演唱會，非常relax。佢仲踢爆老公喺放假期間，都不忘去當地嘅店舖巡視業務，名副其實嘅工作狂！
來源 source: http://hk.on.cc
|
鍾意就快D Share啦！
|
|
|