曼聯球星安東尼馬迪爾日前慘被新隊友伊巴謙莫域失驚無神搶走9號波衫，唔少人都戥佢可憐，不過你以為佢係個被欺凌新星咩？查實佢係個拋妻棄女世紀賤男先真。難為畀佢掉低嘅前妻Samantha因為抑鬱消瘦，都仲不忘喺網上提醒馬迪爾咪畀新歡Melanie呃，可惜係忠言逆耳冇人理，心灰意冷嘅Samantha尋日都向情敵同賤男送上最後祝福，實行劃清界線重新上路，認真陰功呀！
雖然冇咗件9號，但有球迷近日撞到馬迪爾都話佢冇唔開心，無他嘅，有美相伴，齊齊去咗希臘度假。佢個新女友、真人騷女星Melanie仲要喺網上高調擺相曬幸福，擺明係想向Samantha示威。
愛人度過了，女伴不是我！Samantha近期連日來都喺網上還擊，一邊大談自己做單親媽咪，帶住1歲愛女Peyton去玩，而女兒爸爸就掉低佢哋嘅辛苦，另一邊則大爆馬迪爾嘅新戀情真相。據Samantha所講，原來馬迪爾同新歡Melanie相識超過十年，但之前一直未有擦出愛火花，直至馬迪爾同Samantha組織家庭後都一樣。不過，隨住馬迪爾上季加盟曼聯，身價同人氣暴升，Melanie先至痴埋馬迪爾身邊，Samantha就提醒佢前夫，記得小心呢個拜金女喎。
Samantha仲自爆，自從婚變之後，佢就患上抑鬱症，兩個月來就瘦咗成10公斤添。只不過佢知道，為咗個女，佢唔可以繼續自暴自棄，今晨佢就終於清醒，除咗走去伊巴謙莫域會着9號波衫個twitter畀LIKE，仲喺網上留低一句：「我祝佢哋兩個幸福快樂喎！」係咪真心都好，希望Samantha可以重新上路，同囡囡都有美好將來
SO東波同你追實體壇每個精彩時刻！
http://on.fb.me/1PWMCFH
來源 source: http://hk.on.cc
|
鍾意就快D Share啦！
|
|
|
