一個「火雞姐」改寫女神新定義︰愛運動的爽朗女生特別可愛！年僅25歲的郭靜然由昔日學界「欄后」跨入本地球壇，新球季出任九巴元朗主席，與副會長郭時興父女檔拍住上。沒有千金小姐的高人一等，謙稱初哥的「阿靜」落手落腳與幕後團隊分工合作，盼能借助運動員出身的經驗與共鳴，變身九巴元朗「第12人」，跨出足球社區情。
「我覺得鍾意運動嘅人都係好人，有話直說唔會矯揉造作。」曾是香港女子田徑隊代表，未婚夫正是香港「百米飛人」徐志豪，出自郭靜然口中，特別有說服力。自幼已隨「冰鮮大王」爸爸郭時興流連元朗橫州石地場，「阿靜」卻直言除了看父親踢波，對足球認識便只有2006年世盃的「施丹頭槌」。直至兩年前從澳洲學成歸來入場打氣，全因解不開的元朗情意結︰「細細個就喺元朗練跑，呢個球場帶畀我好多回憶。最初因為坐喺VIP區唔多敢嗌，但後尾都係忍唔住同元朗fans一齊大叫『頂住』、『飛機』。」
九巴元朗去季初經歷15場不勝低潮，阿靜曾向父親發晦氣揚言「以後唔嚟睇」，最終還是與球隊同喜同悲，愈嗌愈落力。今季身分「升級」，阿靜反而放下足主「包袱」，走入球迷區忘情歡呼，結果九巴元朗主場大破港會6比2，為新球季打響頭炮，也為她的人生新里程注入強心針。阿靜表示:「以前細個比賽跑輸咗會喊，而家諗番比賽唔係輸就贏，但係練跑過程中，大家一齊辛苦扶持嘅過程，先係最多得着同最懷念，所以我會鼓勵球員唔好太計較輸贏，要睇得開啲。特別係『達Sir』（九巴元朗教練曾昭達）第一次領軍，佢嘅壓力一定係最大，我又係第一次接觸足球工作，不時都會互相安慰鼓勵。」
回想昔日「爆乳酸」的訓練苦況，阿靜仍不禁「打個冷震」，說到共鳴處，更突然感觸落淚︰「運動員要為生計着想，又要憂心未來，佢哋最需要嘅其實唔係金錢，而係大家支持……」愛哭也愛笑的她，回港後曾任職公立醫院營養師，卻難敵面對生老病死的情緒波動。如今來到仍屬男人堆的足球世界，比起醫院多了笑聲，惟獨以往愛與病人傾偈解心結的她，卻被「怕醜仔」考起!「第一次同球隊正式見面食飯，我主動坐過去傾偈，球員突然靜晒唔敢出聲。不過好似顏樂楓、黎厚希等年輕球員與我年紀相若，葉子俊又係元朗原居民，算係容易建立話題。」
阿靜目前主要負責與贊助商聯繫及籌組球迷會，強調還需向幕後團隊多加學習，亦期望借助運動員出身的經驗支援球隊︰「訓練後恢復相當重要，好似體院便有足夠按摩師幫運動員放鬆肌肉，我哋會探討可否為球隊增加安排。」除了後勤支持，阿靜另有期望︰「元朗區近幾年多了不少少數族裔居民，難免掀起矛盾，希望九巴元朗可以帶動大家無分彼此凝聚社區，呢個亦係足球動人之處。」Embrace the moment正是今年港超主題——拉近人與人關係，這位球壇「新丁」，果真稱職！
撐未婚夫出戰東京奧運
郭靜然除成目前港超球會最年輕主席，她的「百米飛人」未婚夫徐志豪亦會出任九巴元朗體能顧問，齊齊力撐球隊到底之餘，「阿靜」仍會身體力行支持近年陷傷病低潮的未來老公，在4年後的東京奧運捲土重來。
徐志豪年初向「阿靜」求婚成功，二人曾經歷接近4年半的異地相隔，性格一靜一動襯到絕。阿靜卻大爆對未來老公又愛又恨︰「當年去福州集訓，第一次傾偈佢就問我『成日跑第2有咩感覺』，我心諗佢想點呀！佢開心同唔開心都係同一個樣，但EQ又好高，呢樣係我最欣賞。」
徐志豪曾在倫奧為港隊出戰4x100米接力，惟近年受傷病影響，無緣出戰剛落幕的里奧。他表示目前仍會專心練跑，期望能將體院學到的運動科學知識融入足球隊。阿靜這位主席太太亦全力支持︰「始終運動員生涯不長，他也希望為未來鋪路，不過只要他願意跑下去，我和家人亦會撐到底。」
想撐本地波？即Like我撐本地波Facebook專頁
http://bit.ly/1Wm3E4Q
SO東波同你追實體壇每個精彩時刻！
http://on.fb.me/1PWMCFH
|
鍾意就快D Share啦！
|
|
|