真係好耐冇見過嘉欣BB喇！
藝人鍾嘉欣（Linda）自從五月宣布懷孕後，一直喺加拿大養胎，亦冇再更新社交網站，據知嘉欣預產期為八月底。
「想快啲返香港」
早前一度有傳嘉欣BB已經生咗，不過無綫高層樂易玲就代嘉欣否認咗，而嘉欣到底幾時生B，一直係大家關注嘅重點。而喺呢段「緊張時期」，嘉欣BB突然喺社交網上載咗一條短片，仲話：「好耐冇見喇，我係鍾嘉欣呀，你哋有冇掛住我呢？我好掛住你哋呀！我都好想快啲返香港同大家見面。」唔少網民一見到條片，都留言話好掛住嘉欣，仲話嘉欣肥咗又靚咗添。
瘋狂硬銷
喺呢個時候，大家一定以為嘉欣有咩好消息公布啦，就喺大家「心亂如麻」同「心如鹿撞」之際，嘉欣BB突然拎出一支護膚品，然後大肆分享佢嘅護膚心得，期間仲不斷重複某個牌子嘅名，一睇就知係宣傳嘢。
分享護膚心得
由於實在太硬銷，所以小編幫大家將嘉欣講嘢嘅內容下刪一千字，剩番低嘅內容如下：「好多女士都忽略咗重要步驟，就係去角質，因為唔去死皮，係會影響皮膚吸收力；而且去咗角質，皮膚會更加白滑細緻。」跟住嘉欣仲教埋大家點樣控油同去印，後加一句：「成日洗臉唔代表去到角質㗎。」
全程遮肚
嗱！宣傳還宣傳，但對於各位女士嚟講，都有番少少實用性喺度嘅。不過相信大家最關注嘅，都係嘉欣BB嘅近況。睇番條片，SUPPOSE仲係佗緊B嘅嘉欣BB，塊臉同手臂都有少少腫，仲全程用毛公仔咕𠱸遮住個肚。不過世事嘅嘢好難講，到底嘉欣係一早拍咗條片，最近先拍條片，定還是暗地裏生咗B先拍片呢？實在不得而知。
好多網民亦都好關心嘉欣BB嘅現況，不過無論點都好，見到嘉欣BB咁健康兼肥肥白白，相信一班粉絲都戥佢好開心。
來源 source: http://hk.on.cc
|
鍾意就快D Share啦！
|
|
|