向氏五哥向華光上月因病去世，今日於紅磡世界殯儀館地下世界堂設靈，儀式以基督教進行，傍晚7時許，向華強及向太陳嵐坐七人車到場，未有發言，見記者影相則展露微笑。向華光去年因呼吸出現困難，被送往銅鑼灣聖保祿醫院，一直昏迷不醒，上月病逝，其兩子向展威、向展邦及家人均在醫院送最後一程。據悉百多萬醫藥費，大部份由其親弟向華強出資(新聞連結：http://bit.ly/2bkZsS2)。問到五嫂（向華光太太）的心情？向太陳嵐表示：「OK其實五嫂都有心理準備嘅，因為佢係前年過年（編按：應為15年2月）嗰陣昏迷嘅，咁成18個月冇醒過，所以大家都有心理準備，唔係突然間嘅。」問到會否抽時間陪五嫂？向太陳嵐稱：「我自己真係好唔得閒，而且我哋唔係成日都見面，即係向家有啲咩喜慶或呢啲事情（喪事）先會見，如果我話抽時間見佢，都係呃你囉。不過佢有仔女、有孫陪，應該都OK嘅。」問到向生會否上台講兄弟點滴？陳嵐表示：「應該就唔會喇。」至於與向華光難忘事，她說：「淨係知佢以前教書嘅，佢就係一個好好嘅人囉，同埋未昏迷前已經講唔到嘢，要用個咪放喺喉嚨嗰度講嘢，呢個就係最難忘。」至於醫療費，她稱：「我老公就係咁嘅人嚟，總之幫到人就一定幫，同埋佢永遠唔會say no嘅，同埋佢哋係同一個阿媽，如果計同一個阿媽嚟講，佢係大哥嚟o架，醫生都係之前我哋啲朋友介紹畀佢嘅，我哋幫到嘅都係錢啫，最終有啲咩決定都係要屋企人囉，一家人點都支持。」
|
鍾意就快D Share啦！
|
|
|