林丹同李宗偉呢對宿敵可謂近年羽毛球嘅經典對決，每次碰頭都會製造無數話題。兩人私底下出名惺惺相惜，原來佢哋嘅人生都有唔少相似之處！唔通兩位選手之間存在上天註定嘅宿世姻緣？由出世講起，林丹喺1983年10月14日出世，而李宗偉就大一歲，喺1982年10月21日出世，咁啱兩個人都係天秤座。天秤座有咩特點？就係個性圓滑、善於平衡，受到星座特點嘅影響，兩位選手喺運動生涯之中亦都顯得八面玲瓏，無論係計技術、抑或成就，都已經係羽毛球界嘅頂級人物。兩位球手喺球壇嘅發展亦都甚為相近。林丹同李宗偉都大約喺2000年成為各自國家隊嘅重點培訓人物，雖然兩人喺2004年雅典奧運都未能取得好成績，不過其後佢哋憑著穩定發揮，喺2008年北京奧運同2012年倫敦奧運合演兩次決賽，12年嘅對決更加被視為羽毛球史上嘅經典。最後，當然唔少得兩個人嘅終身幸福唔好誤會，林丹同李宗偉所在嘅國家都未有同性婚姻條例，而佢地都無揀到對方做終身伴侶。不過，兩位名將嘅太太都巧合地係羽毛球女將，林丹同前「一姐」謝杏芳當然係羽毛球界著名嘅神雕俠侶，而李宗偉嘅太太黄妙珠亦都係馬來西亞前國手，仲喺2007年贏過謝杏芳！
來源 source: http://hk.apple.nextmedia.com
|
鍾意就快D Share啦！
|
|
|