大陸近年網站興起，百度、愛奇藝、土豆、搜狐及騰訊等，為咗爭客、爭點撃吸引人睇，出天價買片、買劇播，搶住買「優先獨家播影權」，好似《如懿傳》播放權就用咗8億人仔，而愛奇藝又用咗4億元人仔買《瑯琊榜2》。網站鬥燒銀紙，未計片方之後再賣埠同賣畀全國咁多家電視台播放，片方已經賺到億億聲，連浙江衛視同湖南衛視都唔夠啲網站fight，完全霸住個market。只要搵當紅嘅紅星去拍，網站就可以留得住一大班「追劇族」，收月費去煲劇，難怪紅星開價幾百萬拍一集劇，收過千萬拍一套戲，仍然大把人搵佢哋。不過唔少資深電影人覺得大陸影圈失衡，大陸當紅演員片酬佔製作費嘅七成，由於唔少大陸星開價太高，變相益咗一班北上搵人仔嘅香港、台灣藝人喺內地有市場，唔怪之得大台藝人都紛紛離巢。據知黃宗澤(Bosco)幫湖南衛視拍《夏日甜心》收1,300萬人仔，王祖藍拍《奔跑吧兄弟》，單係拍一輯已經收過千萬。鄭嘉穎拍廣告都收成千萬人仔，就算係大台二、三線藝人上大陸拍劇都收兩、三萬元拍一集，咁好搵，難怪大台留唔到一眾當家小生花旦喇！無綫小生花旦北上價：(人民幣)
黃宗澤：拍一個綜藝節目約收1,300萬
鄭嘉穎：拍廣告收約1,000萬
王祖藍：拍《奔跑吧兄弟》約收千萬酬勞
佘詩曼：拍劇約40萬一集
陳鍵鋒：拍劇約30萬一集
胡杏兒：拍劇約30萬一集
吳卓羲：拍劇約20／30萬一集
馬德鐘：拍劇約20／30萬一集
|
鍾意就快D Share啦！
|
|
|