張繼聰為令太太謝安琪（Kay）安心暫別幕前一年，一個男人孭起搵錢重任。近年見他頻頻接Job，據知近月常在社交網晒健身相的他，原來接拍了一個健身補充品廣告，為以最fit狀態示人，他展開為期數個月的地獄式訓練，終煉成42吋胸肌、8舊腹肌及至強麒麟臂的身材！除拍廣告外，另一「重大任務」是於本周六在廣告活動上跟偶像－有「世界先生」美譽的動作巨星阿諾舒華辛力加首次見面，屆時兩個「大隻佬」同場騷肌鬥巨胸。
「唔使擔心我會死」
阿聰為了今次健身補充品廣告煉成最勁body，多個月來戒食油、鹽、糖外，每日拍完十個多小時的劇集或電影後，必到健身室再舉重及跑步數小時。而最辛苦是拍廣告前三日，阿聰要在脫水狀況，所以連續三日滴水不沾，阿聰在電話中表示：「最慘係拍廣告前，我拍咗12個鐘頭電影，全部鏡頭都要我跑嚟跑去，拍完電影後就通宵拍廣告，真係好辛苦，好考意志力及體力。（冇飲水會死喎？）當真係好頂唔順時，都可以飲一啖水，不過只係濕一濕個口，要吐番出嚟，其實唔使擔心我會死，因為我可以食生果，生果同烚白雞肉係有水份嘅。」
可以同阿諾舒華辛力加見面超興奮
問他在健身過程中可感辛苦？阿聰竟說：「唔辛苦喎！我最鍾意自虐，同埋我真係好想知自己嘅極限去到邊。」至於可跟阿諾舒華辛力加見面，他興奮謂：「梗係好榮幸好期待！（同佢鬥大隻？）雖然依家我係最Fit狀態，但我點同佢呢啲專業運動員鬥，況且我係演員，太大隻會局限咗角色，我只係追求線條。」笑問他渾身是勁，可擔心有男性追求者？他哈哈笑地說：「我結咗婚㗎啦，男、女都打動唔到我㗎啦。」
太太同屋企人大力支持
阿聰感激太太及家人在背後支持，他透露：「因為我要戒食，但日日都食同一款餐好慘㗎，所以Kay準備咗好多唔同款嘅健康餐，又去搵冇油嘅嘢畀我食，連工人姐姐，阿爸、阿媽都好支持我，我開工啲飯盒好大陣仗㗎。」
密密賺接Job接唔停
據知阿聰近年密密賺，除健身補充品廣告獲50萬酬勞外，他的身價未有因市道差而調整，更不跌返升，由年頭至今已接獲7個廣告及6部電影，連商演騷及電視劇，估計穩袋逾百萬酬勞。有老公養的Kay，則連月來在社交網晒命歎世界，除了飛去越南度假晒靚腿或睇演唱會，又愛在寓所外散步，生活寫意。
|
鍾意就快D Share啦！
|
|
|