劉穎鏇秘密練兵「凸襲」馮盈盈導彈胸失蹤
【陳永峯日本直擊】《2016香港小姐競選》10位準港姐昨日首度穿泳裝亮相，「波霸」、「iPad胸」統統現形！「豐滿組」代表(2)劉穎鏇落力操弗，以34D上圍胸壓一眾佳麗，(5)蘇韻姿則以「心形胸」反擊，與(4)代蓮曦丹美齊齊靠身材搶鏡！反觀賽前經常高調晒谷胸泳裝照的(6)馮盈盈突變「平板胸」，咪咪離奇失蹤的她緊張到胃痛，認真失威！而身形單薄的(3)張寶兒略見離罩，一臉疲態的她明顯跌Watt！
《2016香港小姐競選》10強佳麗在日本福岡拍外景，昨日首度以泳裝示人，身材曲線無所遁形！(2)劉穎鏇（Tiffany）一直深藏不露，她以一件頭泳裝亮相，34D驕人上圍渾然天成，胸壓全場！穿一件頭的(1)關可欣（Angellica）擁34吋上圍同樣是有料之輩，穿吊帶泳衣的(5)蘇韻姿（Andrea）則谷出「心形胸」，令人眼前一亮！
Crystal緊張到胃痛
愛打籃球的Tiffany身形高挑，擁34.5、25.5、35.5運動型結實身材，雖然一件頭泳裝修飾了身形，但腰部仍有贅肉。她坦言介意賽前被封為「大隻鍾嘉欣」，因此落力Keep Fit，昨日亮相時明顯清減不少，成功平反：「依家積極Keep Fit，自己有Baby Fat，呢段時間已經瘦咗6、7磅，平時靠跑步練腹肌。之前畀人笑太大隻，自己都唔鍾意。（腰部仲有啲肥？）係呀！依家盡力減緊。」對於首度以泳裝示人，Tiffany笑言仍未習慣：「喺L.A.（洛杉磯）雖然成日去沙灘，但唔慣畀人睇住同影相。自己平時唔會着到好性感，唔會好Show off。（覺得着一件頭泳衣埋沒咗好身材？）唔會，服裝係大會安排。（身材好，着泳裝會加強信心？）唔會，今次套泳衣性感度唔算高，相信大會照顧同保護我哋，唔會畀我哋走光。」
另一邊廂，賽前頻頻在社交網站大晒谷胸水着照的大熱佳麗(6)馮盈盈（Crystal），三圍31、22、33.5的她「咪咪」離奇失蹤，不過有白滑肌膚依然省鏡，力抗「豐滿組」佳麗！Crystal坦言首度以泳裝示人，緊張到胃痛：「好緊張！喺機場聽到記者講今日要着泳裝，由尋日緊張到依家，緊張到胃痛，但冇失眠，唔知係咪食早餐時飲咗杯齋啡！」談到上圍離奇縮水，向來自信的她說：「可能係角度同燈光問題呀，呢排節食收身，可能係件泳衣嘅設計問題，冇話要突出邊部分。（網上啲相好有身材，依家就消失咗？）又唔可以用消失嚟形容嘅，我個人仲喺度！近排節食收身，啲肌肉緊緻咗囉！（上圍有冇縮水？）我靠做運動Keep Fit，依家成個人都瘦晒，冇話邊部分特別縮水囉！」
張寶兒離罩跌Watt
同樣是大熱的(3)張寶兒（Bowie）三圍31、23、33，身形勻稱，但穿三點式後略見離罩，有疲態的她明顯跌Watt，但笑言很享受以泳裝示人：「自己唔多着泳裝，出發前都有喺屋企試着習慣吓，特別要着畀爸爸睇。除咗要自己習慣，仲要爸爸睇慣我着泳裝。（咁問准男友未？）冇喎！反而冇同佢講。」問到身形較單薄，會否感輸蝕？她說：「係參選後自然咁瘦嘅，可能因為休息得少，但覺得瘦都會有瘦嘅靚。」
|
鍾意就快D Share啦！
|
|
|