2016年9月8日 星期四

西環眼中釘齊當選 星島抹黑輸凸 [壹週刊 - 1383] __,M1,

梁繼昌(左)和莫乃光(右)都係親共傳媒抹黑報導嘅苦主,好彩天有眼,兩人都以高票當選。(葉漢華攝)眾人諸事西環眼中釘齊當選 星島抹黑輸凸中聯辦同689非常緊張立法會選舉,想將阻佢連任嘅人votethemout,選前星島報業集團發動連串抹黑式「報導」,重點招呼非建制派,呢班候選人清一色來自功能組別,同時處身西環極欲攻下嘅界別,但行動未竟全功,各人最後都順利當選。選前被親共傳媒全力招呼嘅苦主,包括教育界 ...


梁繼昌(左)和莫乃光(右)都係親共傳媒抹黑報導嘅苦主,好彩天有眼,兩人都以高票當選。(葉漢華攝)

眾人諸事

西環眼中釘齊當選 星島抹黑輸凸

中聯辦同 689非常緊張立法會選舉,想將阻佢連任嘅人 vote them out,選前星島報業集團發動連串抹黑式「報導」,重點招呼非建制派,呢班候選人清一色來自功能組別,同時處身西環極欲攻下嘅界別,但行動未竟全功,各人最後都順利當選。

選前被親共傳媒全力招呼嘅苦主,包括教育界葉建源、 IT界莫乃光、會計界梁繼昌同社福界邵家臻,報導點樣失實就無謂再多提,反而佢哋嘅得票就值得立此存照。好似梁繼昌獲一萬二千幾票大勝,比起自稱獨立但眾所周知經中聯辦協調出選嘅陳弘毅,得票多近一倍;社工復興運動嘅邵家臻得票逾四千二百,以約七百票贏社總會長葉建忠,兩人都具泛民背景,社工界可謂牢不可破。

資訊科技界方面,競逐連任嘅莫乃光,以逾六千票大勝三千幾票嘅對手楊全盛,前者得票較上屆多近兩倍,反映業界勇於說不,但恐怕又惹來親共傳媒指責係來自種票力量;屬泛民票倉嘅教育界,葉建源獲得四萬五千幾票,同上屆差唔多,但佢對手、偽獨立教聯副主席蔡若蓮,只係拎到一萬八千一百票,西環愈處心積慮扶植,似乎愈係唔受歡迎囉!

社福界有五人混戰,最後由社工復興運動發起人邵家臻勝出,佢之前參與社工註冊局選舉,已經做過票王。(葉漢華攝)

西環想攻破教育界好耐,好彩葉建源頂得住,得票同上屆差唔多,反而今次對手蔡若蓮扮獨立,最終得票原來對葉建源毫無威脅。

有數字有真相,最終《頭條日報》撤回教協喺 IT界種票嘅報導,但報導篇幅大,道歉只出一小格。

雷動累事定救命?

雷動計劃本來用指揮策略選民做雷霆救兵,點知全城都想睇住佢哋個建議先投票,幾乎壞了大事累死自己人。

非建制派全面碎片化,令選情難以評估,而用作策略投票指引嘅雷動聲納系統,更加被狠批發放誤導資訊,有非建制派落選人甚至歸咎雷動計劃嘅棄保建議。

睇番雷動星期日晚發俾策略選民嘅最後投票建議,喺五區直選中一共推薦咗十二個人選,當中十人當選,準確率高達八成三,成為非建制派嘅「造王者」,只得新西社民連黃浩銘同新東新民盟范國威未被棄保成功;至於雷動呼籲支持者要繼續票投嘅人選,更加係齊齊入局,包括港島區嘅陳淑莊,重要關頭獲及時雨,令 Tanya壓線贏到王維基。

泛民政黨選前唔理雷動,但選舉當日先發現計劃主宰自己生死,從結果去睇,雷動似乎可取,但泛民政黨唔少人士認為計劃唔多妥,令到唔少港人睇住雷動嘅建議投票,冇諗過建議係俾二萬五千個參加計劃嘅策略選民,結果選情亂上加亂,但提出計劃嘅戴耀廷又唔肯澄清,搞到幾乎累事。

中聯辦四大契仔女 全部係 Law友

中聯辦近年鍾意喺香港搞「團團伙伙」、「拉幫結派」,專收契仔契女,繼早兩屆立法會選舉力捧梁美芬、謝偉俊上位之後,今屆再扶植何君堯、容海恩兩位選舉期間表現令人側目嘅新科議員。何君堯當選後毫不避嫌話「多謝中聯辦」,完全視一國兩制如無物。

政界口痕友心水清,發現以上四位西環契仔契女都係讀法律出身。鼠王芬城大畢業,跟住北上進修,回港後返母校教書;法律超人澳洲讀完 law,去過城大讀中國法與比較法碩士;「法律界桂綸鎂」容海恩原本讀電腦,咁蹺又係喺城大進修法律並轉行做大狀。何君堯則自稱畢業於英國州瑪高等教育學院,攞到法律學士學位,但被人質疑呢間唔係大學,律師資格亦成疑問。

一個視法律為統治工具嘅政權,點解鍾情搵法律界中人?以為專業形象一定受落,可以抹走西環陣味?咁似乎太睇低香港人喇。

選舉前接受本刊訪問時已講明同西環關係好,何君堯當選後更明言「多謝中聯辦」。(梁譽東攝)

講過「有人話我似桂綸鎂」嘅容海恩,選舉論壇表現慘不忍睹,令人懷疑中聯辦嘅眼光。

梁美芬

謝偉俊

維基落選唔搞電子公投慳二千萬

王維基輸咗選舉,可以專注 HKTV業務,話唔定可以拍套《選戰》續集,將自己嘅心路歷程講一次。(關永浩攝)

今屆立法會選舉,自決派嘅朱凱廸、羅冠聰、劉小麗低開高收,但亦有人高開低收。以 Anyone but CY作為競選口號嘅王維基,無論由民調去到知名度計算,大家一直以為佢攞硬港島一席,點知佢要同泛民大熱門嘅公民黨陳淑莊爭最後一席,最後陳以二千票險勝王出線,保住非建制陣營港島三席。至於佢聲稱最想搶票嘅對象葉劉淑儀,獲六萬幾票,比上屆多咗一倍。

自決派喺立會列陣,王維基亦曾經力 sell「自決」,上個月接受本刊對談訪問時,話選到嘅話就會投資一千六百萬至二千萬搞港島區電子投票系統,就非憲政層面議題進行自決投票,不過選唔到就唔搞喇,因為覺得係選民唔支持佢呢個政綱。如果選唔到仲要俾二千萬出嚟搞「公投」,作為生意人,又真係制唔過嘅。

撰文:巫不言

news@nextdigital.com.hk


鍾意就快D Share啦!
Related Posts Plugin for WordPress, Blogger...