20歲的曉風同三十年前嘅阿倫完全倒模一樣，加上有六呎高，比老豆更正。
娛頭
最強星二代 20歲牛津尖子十項全能 餅印譚曉風靚仔過阿倫
譚詠麟同紅顏知己朱詠婷（ Wendy）的獨生子譚曉風，轉眼已經二十歲，早前兒子由英國返港放暑假，阿倫更在銅鑼灣包起一間餐廳，為囝囝舉行生日（七月一日） party，將曉風一次過介紹給一班身邊摯友認識。
曉風遺傳了優良 DNA，生得同老豆後生時一模一樣，甚至比超級當紅時期的阿倫，更高大靚仔，絕對是超級星二代，加上品學兼優同十項全能，令唔少唱片公司及經理人公司流晒口水，不時向阿倫提出要求，希望簽到這個紅硬星二代。
牛津拔尖高材生
在英國 GCSE（英國中學會考）考獲 12A，以拔尖身份入讀世界頂級學府牛津大學的譚曉風，因為大學放暑假，近月來不時香港、英國兩邊飛。
「因為曉風想體驗吓做工賺錢嘅感覺，所以喺英國搵咗份暑期工，唔可以成個暑假都留喺香港，要趁有幾日假，先飛返嚟見吓阿倫同 Wendy。個仔咁生性，阿倫好自豪㗎！」阿倫身邊人說。
上月廿八日，曉風從英國返港，媽咪 Wendy親去機場接機。著住白恤衫，戴住眼鏡的曉風，身形高大，肯定過六呎，廿歲牛津高材生，臉上不期然流露着一份書卷氣息。
出閘後， Wendy想幫囝囝推行李，但孭住背囊，右手攞住一大袋，左手推住行李的曉風卻 man爆，不讓媽咪郁手。最後， Wendy惟有幫手一齊推住件行李。此一刻，母子間的感情，濃郁到呢！
靚仔過阿倫
第二日，阿倫一家三口全家出動，到上環食日式烤肉，同場還有一班親戚朋友，因為人多，大家需要分兩枱坐，阿倫和曉風坐同一枱，但兩父子中間隔了一個四眼仔，至於 Wendy，就陪另外幾位長輩坐另一枱。
剛滿二十歲的倫仔，胃口好好，食足全晚；其間，曉風過枱坐在媽咪旁邊同長輩傾偈，兩母子甚至黐埋坐一張櫈，十分親密。
睇唔出，原來曉風好吹得！除了專登過枱向長輩問好，全晚同老豆阿倫更加雞啄唔斷，就算兩父子相隔四十六年，一樣冇代溝。
一餐飯食了大約兩個鐘，阿倫埋單後先行上車準備，曉風則負責殿後，跟在場親友逐一道別，之後才上車，坐在阿倫旁的前座乘客位，由老豆做柴可夫，揸車離開。
除低眼鏡同帽，笠番件外套加埋 gel咗頭，曉風當堂型仔晒，仔細睇，他生得極似阿倫，完全餅印一樣；當中以鼻同笑容最似老豆，但就比阿倫年輕最當紅時期更加靚仔。
能文能武瓣瓣掂
據了解，曉風遺傳了阿倫身上的優點外，音樂方面的天分亦得到真傳。除了是鋼琴八級，識打鼓和彈結他的曉風歌藝亦有番咁上下；幾年前，更曾幫老豆秘密唱過和音，又試過在阿倫六十歲生日 party中，同樂隊 Mr.一齊合唱《感動》，送老豆驚喜。
阿倫鍾情踢波，曉風亦一樣，但他的強項其實是打籃球和網球，更加係牛津大學的划艇隊成員。
但講到讀書，曉風就大幅度拋離老豆阿倫。一三年，在英國 GCSE考試獲得 12A，以拔尖成績考入牛津大學的他，五歲時已憑一幅素描畫，贏得全港兒童繪畫比賽亞軍，天生多才多藝，簡直十項全能。
包場賀曉風滿廿歲
又叻又靚仔，兼且是超級星二代，曉風早已成為唱片及經理人公司爭奪目標。
「幾年前，阿倫所屬嘅環球唱片同藝能都有問過佢，話好想簽曉風，不過阿倫即時就拒絕：『你哋諗都唔好諗呀！』雖然阿倫話就話等曉風讀完書自己決定，但係佢同 Wendy都唔想個仔入行，難得個仔咁讀得書，梗係想佢將來喺事業上有一番成就。
「始終娛樂圈多引誘， Wendy最擔心係如果俾個仔入行，好易感染到啲壞習慣。其實曉風由細到大都好聽父母話，所以阿倫同 Wendy唔贊成嘅話，相信曉風都唔會考慮入行。」阿倫身邊人說。
阿倫雖然不主張子承父業，但今年曉風二十歲生日（七月一日），他卻在銅鑼灣包了一整間餐廳開 party，為兒子慶生，更一次過請晒自己一班圈中摯友到場，介紹大家認識。唔再收埋個寶貝仔，讓曉風接觸娛樂圈中人，可見阿倫即使唔贊成兒子入行，亦保留客觀態度，實行仔大仔世界！
曉風成長記錄
紅顏知己 Wendy（朱穎婷）原是譚詠麟歌迷會會員， 95年， Wendy升呢由歌迷變情人，翌年更為阿倫誕下兒子譚曉風；兩母子極為低調，直至 06年，譚父去世，兩母子身份亦刊登於訃聞中，二廠終於光明正大見人。
反叛星二代
圈中不少星二代，自恃有家底，又有星爸星媽保護撐腰，唔使捱又反叛，學壞話咁易。
撰文、攝影、攝錄：娛樂組
|
鍾意就快D Share啦！
|
|
|
