「法律界馬海倫」容海恩（前左）做咗新民黨「豬一般的隊友」，連黨主席葉劉淑儀都睇唔過眼，唔滿意佢嘅論壇表現，但容海恩只係覺得自己未能顯示真性情。（黃雲慶攝）
眾人諸事
容海恩冇睇《寒戰》 葉劉頭痕
身為西環四契之一，新民黨容海恩獲中聯辦全力保送下當選，但呢位有大律師之名嘅候任立法會議員，議事能力之低，用一句「豬一般的隊友」來形容最為貼切，黨友怕咗佢，甚至連黨主席葉劉淑儀都被佢連累，公開話唔滿意佢表現。
最新例子係星期一朝早出席電台節目，講到朱凱廸被恐嚇事件，民建聯周浩鼎認為保安局要嚴謹跟進時，容海恩好有高見咁反對保安局介入，認為會影響警方調查，搞到阿鼎啞晒口唔知點接。
查實對政府架構有基本認識，都知警務處屬保安局之下部門，連《寒戰》都有一幕，飾演保安局局長嘅劉德華走去見做警務處高層嘅郭富城啦。容海恩所屬嘅新民黨，黨主席葉劉淑儀正正係前保安局局長，好心容大狀問主席一句：「不如你話俾我知。」請教同惡補吓呢啲常識啦。
「最佳溝通員」老是常出醜
自詡「法律界桂綸鎂」，但網民揶揄為「法律界馬海倫」嘅容海恩，喺多場選舉論壇被對手質到語無倫次，出醜無數次，被取笑應該去做溝通員而唔係選議員，再被質疑只係一個花瓶。
由於「被分票」而被西環放棄嘅工聯會鄧家彪，選舉後喺 facebook借題發揮，黨友麥美娟即時留言話自己同鄧冇「時差」，唔使同對方「溝通溝通再溝通」，擺明針對容海恩。
建制陣營中人唔俾面容海恩，但佢當選繼續講會提出修改議事規則阻止拉布，但建制派今次選情失利，直選議席唔過半，功能組別唔計自由黨四票更隨時失守，所以容海恩咁樣出招如同浪費時間，甚至變成另類拉布，阻住原有議程。
容海恩出醜事件簿
一，被工黨張超雄質疑新民黨區議員反對智障學校搬遷，容海恩自創新四字詞「議政時差」，為黨友取態有出入開脫。
二，回應人民力量陳志全質詢是否支持以陸路入境稅解決水貨問題時，反問「咁飛嗰啲呢」，令公眾驚悉有人坐飛機走水貨。
三，陳志全追問佢點反拉布，結果意外暴露完全唔識《基本法》。
沙田退黨重災區新民盟稱冠
「沙博乙三子」丘文俊、陳兆陽同趙柱幫退出新民主同盟，牽頭嘅丘文俊呢一招，學足師父鄭家富，想當年阿富因為民主黨同中聯辦密室談判，佢拋下一句「唔想強我所難，又唔想強黨所難」而含淚退黨，結果換來唔少掌聲，但今次唔知係咪計錯數，票累死范國威，政治生涯應該玩完。
沙田係全港非建制佔議席比例最高嘅一個區議會，亦係退黨集中地，上年區選後，有人搞咗個「新退黨同盟」，本身已經有五個獨立泛民成員，包括麥潤培、衞慶祥、容溟舟、黃學禮同黎梓恩，唔知今次沙博乙三子會唔會申請加盟呢？話時話，呢班退黨大軍現時有八個成員，當中一半係由新民主同盟出走，個黨係咪都要檢討吓？
丘文俊：范國威想做一人黨
新民主同盟范國威保唔住新東議席，歸咎於上屆替佢助選嘅師父鄭家富票，仲話新民盟「沙博乙三子」倒戈幫鄭拉票，三子選後出聲明退黨，新民盟亦開會踢佢哋出黨。
丘文俊回應時只係話鄭家富都係佢師父，佢今次已經退黨，黨內不和嘅細節佢唔想講太多。但佢澄清投票當日同樣有幫范國威拉票，喺乙明唔少街坊都投范。但如果話佢哋三個係叛徒，佢就唔同意，「佢不嬲都孤立我哋，當我哋透明，佢自己做嘅嘢，佢心中有數。政治倫理唔係你要票時就要俾你，而係互相尊重，街坊先會俾票你。但四年嚟佢都冇嚟過。新民盟唔係范國威一個人嘅黨，點解做咗議員之後就把持所有資源？」不過上星期六下晝，范國威就終於去咗謝票。
佢哋三個嘅政治前途問題，丘話冇諗咁多，只係想做好地區工作，最有可能係繼續同工黨合作，咁會唔會入工黨呢？佢答得好誠實，「依家咁樣，入去可能會累咗佢哋。但合作應該都會。」
撰文：巫不言
|
鍾意就快D Share啦！
|
|
|