阿徐惹麻煩， Eason百忙中抽空陪伴左右，老夫老妻來講，稱得上細心。
探熱針
雙康大戰 煩爆阿徐靠 Eason呵番
自從瘦到得棚骨的陳子聰近照由徐濠縈的私人 IG流出，阿徐忙住搵二五想俾何超儀有個交代之際，好友蘇永康忽然「厚多士」，爆料指她的經理人鄭紹康是爆相人。兩個加埋成百歲的男人，隨即隔空互片，搞到夾喺中間的阿徐左右做人難，煩上加煩。
阿徐以為靠做運動可以減壓，點知成效一般，都是要 Eason出馬，聽老婆吐苦水，再做埋柴可夫，阿徐先至有番笑容。
搞着阿徐
暴瘦陳子聰近照流出，徐濠縈認為是內鬼所為。上週五（九日）蘇康出席活動時爆 seed指她的經理人鄭紹康是家賊，同時借題發揮數臭對方。「呢行入面，我冇邊個唔鍾意，佢（鄭紹康）係其中一個！佢係做咗啲嘢好侮辱我……話個 event搵我去，出三千蚊…… TVB藝人都唔只，呢個係侮辱性嘅價錢，有冇病！」蘇康說。
有花生友指蘇康新劇《隱世者們》出街在即，爆 seed純為劇集搏宣傳，但心水清都睇得出佢哋仇口好深，寧願有殺錯冇放過。
至於鄭紹康第一時間搬出阿徐做擋箭牌，兼拍片澄清。成件事最頭痕應該是徐濠縈，一個是經理人，一個是好友，順得哥情失嫂意，兩難。
「一個識咗超過廿年，一個幫你接 job嘅，兩個都各有問題，阿徐企喺邊一面，都實得罪另一方，所以阿徐到而家都無講多句，就係想件事快啲丟淡！」徐濠縈身邊人透露。
心事重重
日前，阿徐孖蔡一智老婆周雪芳去淺水灣做 gym減壓。下午三時，一臉疲態的阿徐一行三人步出健身中心，坐在門外的長櫈吹水，十五分鐘後，周雪芳同友人先行離去，留下阿徐一人，只見她對着電話發呆，心事重重，半小時後一身街坊裝的 Eason殺到，兩公婆繼續坐在戶外，密密斟，其間 Eason電話響起，睇住老公傾電話的阿徐，攰到要瞓低，可想而知近日的雙康大戰令她幾煩。
兩人在健身中心的小食部買完小食，隨即轉往商場另一出口準備攞車離開，心情不錯的 Eason發揮吹神本色，同泊車職員雞啄唔斷，傾到連阿徐都忍唔住搭訕，傾埋一份，等足十分鐘， Eason那一架價值四百萬的開篷 Aston Martin終於駛到，一直愁眉苦臉的阿徐，經老公不停發功，總算有番些少笑容，才上車離開。
撰文、攝影、攝錄：娛樂組
|
鍾意就快D Share啦！
|
|
|