雖然帶病上陣，但全晚 Sammi勁力十足，的確係「有幾多，俾幾多！」
娛樂偵訊
容祖兒獻計 Sammi針灸開聲
黃牛飛炒到㷫烚烚的八場鄭秀文《 touch mi 2世界巡迴演唱會》，上週五（九月十六日）掀開序幕；樂迷引頸以待， Sammi亦為個唱狂操三個月。
可惜，開騷前一星期， Sammi因病失聲。
本身有哮喘，打開聲針有類固醇， Sammi惟有頂硬上，邊唱邊喊講「對唔住！」
據知，頭場後， Sammi連環收到圈中老友短訊問候，當中同樣試過開騷失聲，飽受折磨的容祖兒，便建議她用針灸療法。
走住音唱
講明「有幾多，俾幾多」，就算爆炸聲開騷，完全是 EQ測試的 Sammi照勁歌熱舞加連串靚衫。以 sexy medley作為開場， iPad胸的 Sammi突變 3D，仲玩埋凸點，加上同男 dancers貼身舞，下體任摸，連 Sammi都自嘲：「女人唔怕揀錯老公，最緊要揀啱內衣，飛機場都可以變鹹肉粽。」
今次 rundown為順應民意， Sammi挑選大量經典金曲，其中一部分串燒歌，包括《愛的輓歌》、《如果我們不再見》、《你愛我愛不起》、《心血來潮》等，可惜抱病 Sammi即使出盡「洪荒之力」，一去到高音位就走音。不過觀眾實在好愛，自動做和音萬人大合唱，令好自己的 Sammi，喊晒囗向四面台鞠躬：「對唔住你哋（觀眾）！」
「今次 rundown有八成嘅歌都係 Sammi啲 fans要求佢唱，尤其係 encore嗰 part medley，經過第一場之下，第二晚為咗留聲，跟住成 part抽起， Sammi好 sad，因為佢知好多觀眾撲飛撲得好辛苦，有啲人仲係俾錢買黃牛，所以更加覺得對唔住觀眾。」一名工作人員說。
唔想打類固醇
翌日， Sammi在 ig上載自己在做針灸治療的自拍照，素顏的她面上插滿針，而喉嚨重災區更插有八支針。「尋晚半夜三更咳到六點，幾乎棚牙都咳埋出嚟！惟有針灸，針針到穴，不過聲線有進步咗！ yeah！」 Sammi留言。
「其實好多人都叫 Sammi打開聲針，但佢好抗拒，因為有類固醇，會有 side effect，所以容祖（兒）提議佢做針灸， Sammi就肯試，第二日即刻做，把聲真係開番啲，嚟緊幾日都會 keep住針！」
安仔請假睇實
老婆出晒事，原本只會隔日到的安仔，即刻推掉手頭工作，日日準時到紅館打卡。
「原本安仔只係請咗幾日假，不過見到老婆咁，佢都決定推晒啲 job，只係其中有一日就到時間，佢可以照樣四、五點去到紅館，其他日子，都係陪 Sammi踩到完騷。」一名工作人員說。
失聲演唱會
開騷壓力大，歌手失聲發燒，甚至擇日重唱，亦有發生。
撰文、攝影、攝錄：娛樂組
|
鍾意就快D Share啦！
|
|
|