謙謙趕造人 楊怡：生啦生
恭喜！恭喜！楊怡與羅仲謙姊弟戀修成正果，昨日在香港擺酒，一對新人幸福無限咀，又遊車河40分鐘行大運，講到明「趕生仔」的謙謙，急不及待展示「啄木鳥式」愛的前奏，錫爆老婆！而幸福滿瀉的楊怡透露簽字時感動爆喊，口快快講錯說話的她，即連講幾次「生啦生啦」補飛，對「趕生仔」的老公夫唱婦隨！
37歲楊怡與32歲羅仲謙今年3月在英國註冊結成夫婦後，昨日在香港九龍站某酒店筵開52席，共花7位數宴請親朋，一對新人由朝忙到晚，期間更密密咀，甜蜜滿瀉！一對新人下午約4時簽字結婚，之後受訪她自爆簽字時感動喊爆，更不慎口快講錯說話，她說：「唔算緊張，係好感動，入會場已經喊。（咩誓詞咁感動？）唔記得咗，死啦死啦……生啦生我同佢講，我會講5分鐘，你唔好講1秒鐘呀！其實我要嘅幸福好簡單，唔使食好嘢，唔使坐靚車，只要我哋手牽手就可以行到老！（婚戒有寓意？）佢嘅係H，我嘅係T，係我哋英文名開頭，寓意白頭到老，一齊開心幸福！」提到家姐楊卓娜送上手工城堡，阿怡眼濕濕喊着說：「事前唔知，好靚！家姐手工好叻，連花車嘅公仔都親手整，媽咪為我着裙褂時我都好感動，唔識講，媽咪、家姐錫自己係知嘅，一切在心中！」
自創羅氏招式連環咀
謙謙也不忘對老婆發表愛的宣言：「我入到簽字會場已經喊，比喺英國時更感動，好多謝阿怡，由拍拖到依家踏入第六年，跟住結婚，只有阿怡一個全心全意支持我、信任我，我認定呢個女人我應該永遠保護！做人老公當然要錫老婆，但冇可能一直好恩愛，感情有高低潮，如果嘈交我一定會就晒佢！（想兩年抱三？）想生女先，自己係細佬，做細佬好幸福，有家姐係好事，隨緣！（已經開始造人？）係，開始咗，睇天意（去邊度蜜月？）月中要返內地工作，要出年，未定去邊。」一對新人應要求咀嘴，謙謙笑言要花式表演供大家直播，二人極速咀足6次，連換三個羅氏花式，並命名為「啄木鳥式」，之後再送上長達13秒情深一吻！阿怡之後貼心為老公抹嘴，又搞笑說：「個嘴好油！」
花車九龍新界行大運
婚宴於昨晚9時舉行，一對新人隨音樂進場時全場起哄，司儀林盛斌（Bob）大搞氣氛，當兩人切結婚蛋糕後，阿Bob摸謙謙時笑說：「嘩！你背脊濕晒！」爆他緊張到出汗，而楊怡講到兩人甜蜜片段時，老公亦忍不住流下男兒淚！其實謙謙昨晨往接新娘時已經緊張到滴汗兼聲沙，他說：「好似未整理好思緒，緊張驚帶漏嘢，一朝早好似傻咗咁周圍check，瞓得唔好，同阿怡兩日冇見。」他順利接新娘後，隨即跟楊怡化身接吻魚，前後咀足六次，每次長約十秒，即使上到車仍繼續咀，一對新人之後到大埔比華利山別墅男家完成斟茶儀式，下午1時許離開，再遊車河行大運約40分鐘，返回九龍站，期間楊怡頻頻校低車窗並揮手說：「辛苦晒！小心啲呀！」
文：影視組
|
鍾意就快D Share啦！
|
|
|
