搞啲咁嘅嘢呀？！
藝人蔡思貝同楊明近日去咗馬來西亞宣傳，有網友爆出二人喺當地舉止親密，共食同一杯雪糕同飲品。而無綫Facebook專頁Jade Pack翡翠娛樂亦曾經做過直播，影住佢哋齊齊介紹當地美食！
一支飲管兩份用
片中食緊椰子雪糕嘅蔡思貝大讚好好味，仲舀咗啖畀楊明食，不過楊明推開示意唔食，跟住蔡思貝就用另一隻匙羹餵楊明。開頭好似好拘謹唔肯食蔡思貝嘅口水尾，但係之後楊明買咗杯凍飲，自己試完一啖就餵蔡思貝飲，共用一支飲管，望落似足情侶！不過，楊明正印其實係莊思明喎！平時佢哋喺人前人後都表現得十分恩愛，唔知今次楊明返去要唔要跪玻璃呢？
對於二人表現親暱，蔡思貝接受《東網》訪問時回應謂：「依家喺馬來西亞宣傳無綫Astro頒獎禮，喺當地同楊明去試咗個椰子雪糕。想同網友分享所以玩fb live。（怕莊思明誤會？）唔會，同佢好熟㗎，同楊明都係好兄弟，合作過兩部劇，好熟。」
思明勁大方唔介意
楊明亦有透過電話受訪，佢表示：「直播時間得幾分鐘，而且要介紹幾款嘢食，好趕。（間接打茄輪？）時間好緊逼，其實冇咩所謂，當然唔會成日咁嗰日同成班人食飯，唔通又同晒咁多個打咩？！」而其女友莊思明亦表現大方，更搞笑地向《東網》透露：「我唔介意同思貝間接打茄輪。」思明百份百信任男友楊明，完全係完美女友！
來源 source: http://hk.on.cc
|
鍾意就快D Share啦！
|
|
|